ආන්ඩ්‍රේ ඩේමන් විසිනි.
මෙහි පලවන්නේ ලෝක සමාජවාදී වෙබ් අඩවියේ 2023 නොවැම්බර් 19 දින පල වූ ‘US, Israeli lies about “command center” at Al-Shifa hospital fall apart ‘ යන ආන්ඩ්‍රේ ඩේමන් විසින් ලියන ලද ඉදිරිදර්ශන ලිපියේ සිංහල පරිවර්තනය යි. පරිවර්තනය මිගාර මල්වත්ත විසිනි.
ගාසා තීරයේ විශාලතම රෝහල වන අල්-ෂිෆා රෝහල මිලිටරි අණදෙන මධ්‍යස්ථානයක් බවට වූ කියාපෑම, දරුණු යුද අපරාධ මාලාවක් මඟින් දුසිම් ගනන් ජනයා ඝාතනය කරමින් ද, තුවාලකරුවන් ඇතුළුවීම හෝ පිටවී යාම වලකා ලමින් ද, රෝහලට එල්ල කළ නිර්දය බෝම්බ හෙලීම සාධාරණීකරණය කිරීමට සති ගණනාවක් තිස්සේ ම ඊශ්‍රායලය භාවිතා කළේය.
රෝහල තුළ ප්‍රාණ ඇපකරුවන් නොමැති බව පිළිගනිමින් ඊශ්‍රායල අගමැති බෙන්ජමින් නෙතන්යාහු බ්‍රහස්පතින්දා ප්‍රකාශ කළේ, “ඔවුන් [ප්‍රාණ ඇපකරුවන්] ෂිෆා රෝහලේ රඳවා ඇති බවට අපට ප්‍රබල ඇඟවීම් තිබුණි. ඔවුන් [එහි] සිටියා නම්, ඔවුන් මුදා ගනු ඇත” යන්නයි.
ඔක්තෝම්බර් 27 දා, X හි පළ කරන ලද ලිපියක, ඊශ්‍රායල ආරක්ෂක හමුදාව (IDF) ප්‍රකාශ කළේ අල් ෂිෆා රෝහල “හමාස්වරුන්ගේ ත්‍රස්තවාදී ක්‍රියාකාරකම්වල ප්‍රධාන මූලස්ථානය ලෙස ක්‍රියා කරන” බවයි. පෝස්ටුව සමඟ රෝහලට යටින් මීටර් සිය ගණනක් පුරා විහිදුණු විශාල සංකීර්ණ ඉදිකිරීමක් පෙන්වන සජීවිකරණයක් ද විය. ඊශ්‍රායලයේ ප්‍රකාශයන් ධවල මන්දිරයේ, පෙන්ටගනයේ සහ රාජ්‍ය දෙපාර්තමේන්තුවේ නිලධාරීන් විසින් කිහිප වතාවක්ම පුනරුච්චාරණය කරන ලදී.
අඟහරුවාදා, ජාතික ආරක්ෂක කවුන්සිලයේ ප්‍රකාශක ජෝන් කර්බි ප්‍රකාශ කළේ, “හමාස් සහ පලස්තීන ඉස්ලාමීය ජිහාඩ් සංවිධාන අල්-ෂිෆා ඇතුළු ගාසා තීරයේ සමහර රෝහල් සහ ඒවාට යටින් ඇති උමං මාර්ග , සැඟවීමට සහ ඔවුන්ගේ හමුදා මෙහෙයුම්වලට සහාය වීමට සහ ප්‍රාණ ඇපකරුවන් රඳවා ගැනීමට භාවිතා කරන බවට අපට තොරතුරු තිබේ.” යන්නයි.
බ්‍රහස්පතින්දා බයිඩන් මෙම සනාථ නොකළ ප්‍රකාශය පුනරුච්චාරණය කරමින්, “මෙන්න තත්වය: ඔබට දකින්නට තිබෙන්නේ හමාස් විසින් ඔවුන්ගේ මූලස්ථානය, ඔවුන්ගේ හමුදාව රෝහලක් යට සඟවා තබා ගනිමින් පළමු යුද අපරාධය සිදු කරන තත්වයකි. එය සත්‍ය කරුණකි. ”යැයි කියා සිටියේය.
“හමාස් සංවිධානයට අල්-ෂිෆා රෝහලට යටින් අණදෙන මධ්‍යස්ථානයක් ඇති බවට එක්සත් ජනපදය දැක ඇත්තේ කුමන ආකාරයේ සාක්ෂියක්දැයි අපට විස්තර කරන ලෙස” වාර්තාකරුවෙකු විමසූ විට බයිඩන් පිළිතුරු දුන්නේ, “නැහැ, මට ඔබට කියන්න බැහැ. මම ඔබට නොකියමි.” ලෙසයි.
බදාදා, IDF විසින් ප්‍රසිද්ධ කෙරුණු වීඩියෝවක් මඟින්, අල්-ෂිෆා හි MRI යන්ත්‍රයක් පිටුපස සඟවා ඇති බව පවසන ලද ප්‍රහාරක රයිෆල් දුසිම් භාගයක්, ෆ්ලැක් ජැකට් දෙකක් සහ පරිගණකයක් පෙන්වන වීඩියෝවක් පළ කළේය. ප්‍රබල චුම්භක ක්ෂේත්‍රයක් සහිත MRI යන්ත්‍රයක්, එය ක්‍රියාත්මක වීමේ දී, ආයුධවලට කාමරය පුරා පියාසර වීමට නො සැලැස්වූයේ මන්දැයි පැහැදිලි කිරීමට උත්සාහයක් ගෙන නොතිබුණි.
ඊශ්‍රායලයේ “සාක්ෂි” කෙතරම් දුර්වලද යත්, එක්සත් ජනපද ආන්ඩුව පවා එයට පිටුබලය දීමට තරම් නිර්ලජ්ජිත නොවීය.
බ්‍රහස්පතින්දා මාධ්‍ය හමුවකදී අල් ජසීරා වාර්තාකරු පැටී කුල්හාන් පෙන්ටගනයේ ප්‍රකාශිකා සබ්‍රිනා සිං ගෙන් ඇසුවේ, “ඉතින් ඔබ කියන්නේ බොඳ වූ ලැප්ටොප් එකක, ෆ්ලැක් ජැකට් එකක, රයිෆල් අතලොස්සක වීඩියෝ පටය, හමාස් සංවිධානය රෝහලේ ක්‍රියාත්මක වන බවට ඔබ කළ ප්‍රකාශයට පිටුබලය දෙන බවද?”
මෙයට, සිං පිළිතුරු දුන්නේ, “හමාස් සංවිධානය සිය මෙහෙයුම් කටයුතු සහ ක්‍රියාකාරකම් සඳහා සහ ත්‍රස්තවාදී ක්‍රියාවන් තවදුරටත් ක්‍රියාත්මක කිරීම සඳහා ගාසා තීරයේ රෝහල් භාවිතා කරයි. අල්-ෂිෆා රෝහල ඉන් එකකි” යනුවෙනි.
“එය තහවුරු කිරීමට වීඩියෝවක් තිබේද?” කුල්හාන් ඇසුවේය. එයට සිං පිළිතුරු දුන්නේ, “මම ඒ කරුණ එතනින් නවත්වමි” යනුවෙනි.
බ්‍රහස්පතින්දායින් පසුව , දින දෙකක් පුරා රෝහල් ප්‍රදේශය සෝදිසි කිරීමෙන් පසු IDF ප්‍රකාශ කළේ රෝහල් භූමියේ ප්‍රහාරක රයිෆල්වලින් පිරුණු වාහනයක් සහ භූගත ව්‍යුහයකට පිවිසෙන විවරයක් සොයාගත් බවයි.
1980 ගණන් වලදී, ඊශ්‍රායලය විසින්ම රෝහලේ ප්‍රතිසංස්කරණයක් සිදු කරන ලද අතර, “රෝහලේ රෙදි සෝදන සහ විවිධ පරිපාලන සේවා ස්ථානගත කරන ලද විශාල සිමෙන්ති බිම් මහලක්” ගැන Haaretz පුවත්පත සඳහන් කර ඇත.
ලෝක සෞඛ්‍ය සංවිධානයේ වාර්තාවලට අනුව, ගාසා තීරයට එල්ල වන ඊශ්‍රායල ප්‍රහාරයේ ආරම්භයේ සිට, සෞඛ්‍ය සේවා මධ්‍යස්ථාන මත අවම වශයෙන් ප්‍රහාර 137 ක් එල්ල කර ඇත. එහි ප්‍රතිඵලයක් ලෙස සෞඛ්‍ය සේවක මරණ 16 ක් සහ තුවාල ලැබූවන් 38 ක් ඇතුළු මරණ 521 ක් සහ තුවාල ලැබූවන් 686 ක් වාර්තා වේ.
බහුජන හාමතය සහ විජලනය මධ්‍යයේ ගාසා තීරයේ මානුෂීය තත්ත්වය අතිශය ඛේදජනකය. බ්‍රහස්පතින්දා දිනය මරණ සංඛ්‍යාව පිලිබඳ යාවත්කාලීන කිරීමක් සිදු නොකරන ලද අඛණ්ඩ පස් වන දිනය සනිටුහන් කළේය. සිකුරාදා වන විට මරණ සංඛ්‍යාව 11,078 ඉක්මවා තිබූ අතර, ඉන් 4,506 ක් ළමුන් සහ 3,027 ක් කාන්තාවන් බව කියනු ලැබේ. නව වාර්තා නොලැබීමට හේතුව, “උතුරේ රෝහල්වල සේවා සහ සන්නිවේදන බිඳවැටීම” යැයි එක්සත් ජාතීන්ගේ සංවිධානය කියා සිටියේය.
සැපයුම්කරුවන් විසින් ඉන්ධන සම්පූර්ණයෙන්ම අවසන් වී ඇති බව ප්‍රකාශ කිරීමෙන් පසුව සහ ඊශ්‍රායලය සන්නිවේදන යටිතල පහසුකම් මත ප්‍රහාර එල්ල කිරීමෙන් පසුව, ගාසා හි විදුලි සංදේශ සේවා බ්‍රහස්පතින්දා යලි වැසී ගියේය.
ඉන්ධන නොමැතිකම හේතුවෙන් රටෙහි මානුෂීය යටිතල පහසුකම් බිඳවැටීමෙන් පසු අඛණ්ඩව දෙවන දිනටත් ආධාර ට්‍රක් රථ ගාසා තීරයට ඇතුළු නොවීය. එක්සත් ජාතීන්ගේ මෑත පෙරදිග පලස්තීන සරණාගතයින් සඳහා වන සහන සහ වැඩ ඒජන්සිය පැවසුවේ සිකුරාදා සිට ආරම්භ වන කිසිදු මානුෂීය ආධාර රථ පෙළක් සම්බන්ධීකරණය කිරීමට තමන්ට තවදුරටත් නොහැකි වනු ඇති බවයි.
ඊශ්‍රායල හමුදා අල් මාගාසි සරණාගත කඳවුරේ උතුරු දොරටුවේ පිහිටි මධ්‍යම පෙට්‍රෝලියම් මධ්‍යස්ථානයට ප්‍රහාර එල්ල කළ අතර, එම ප්‍රහාරවලින් පුද්ගලයන් 9 දෙනෙකු මිය ගොස් තවත් දුසිම් ගනනකට තුවාල සිදු විය. එක්සත් ජාතීන්ගේ සංවිධානය විසින් සපයන ලද මානුෂීය තත්ත්වය පිළිබඳ පින්තූරය අභාග්‍ය සම්පන්න එකකි:
ගාසා නගර මධ්‍යයේ ක්‍රියාකාරී ගොඩබිම් මෙහෙයුම් විසින් ගලවා ගැනීමේ කණ්ඩායම්වලට, ගිලන්රථවලට සහ මිනිසුන්ගේ අත්‍යවශ්‍ය අවශ්‍යතා සපුරා ලීමට; විශේෂයෙන් ආහාර සහ ජලය ලබා ගැනීමට; අඛණ්ඩව බාධා කර ඇත. ගාසා නගරයට බටහිරින් පිහිටි අසල්වැසි නිවෙස් වල ඉතිරිව ඇති ආහාර සහ පානීය ජලය ක්ෂය වීමෙන් පසුව ඔවුන් උපකාර ඉල්ලා ඇත. ඊශ්‍රායල භට පිරිස් සිටීම සහ සටන් පැවතීම හේතුවෙන් ඔවුන්ට තම නිවෙස්වලින් පිටව යාමට නොහැකි බව වාර්තා වේ. කඩා වැටුණු ගොඩනැගිලි සහ නිවාස යට අතරමං වූ කුටුම්භයන් සහ ඔවුන්ගේ පවුල්වල සාමාජිකයන් විසින් කරන ලද බහුවිධ ආයාචනාවලට පිළිතුරු ලැබී නැත. පලස්තීන රෙඩ් ක්‍රෙසන්ට් සංගමයට (PRCS) සහය වන ලෙස සහ ඉවත් කර ගන්නා ලෙස කෙරෙන කැඳවුම් සිය ගණනකට ප්‍රතිචාර දැක්වීමට නොහැකි වී ඇත.
දින දහයකට වැඩි කාලයක් උතුරු ගාසා තීරයේ බේකරි කිසිවක් සක්‍රීයව නොතිබූ අතර වෙළඳපොලේ තිරිඟු පිටි නොමැත. X හි සටහනක, ලෝක ආහාර වැඩසටහන ලියා ඇත්තේ, “ඔක්තෝබර් 7 වන දින බේකරි 23 කි. ඔක්තෝබර් 17 වැනිදා වන විට බේකරි 5 කි ඔක්තෝබර් 31 වෙනිදා බේකරි 1කි. අද බේකරි කිසිවක් නැත. @WFP හි #ගාසා හි අවසන් ගිවිසුම්ගත බේකරිය ඉන්ධන නොමැතිකම හේතුවෙන් වසා දමා ඇත. අද සමස්ත ජනගහනයටම පාහේ ආහාර ආධාර අවශ්‍ය වී ඇත.”
