World War

ආන්ඩ්‍රේ ඩේමන් විසිනි.

මෙහි පලවන්නේ ලෝක සමාජවාදී වෙබ් අඩවියේ 2023 දෙසැම්බර් 12  දින පල වූ ‘As Israel’s genocide continues, 9 in 10 Gazans report lack of food’ යන ආන්ඩ්‍රේ ඩේමන් විසින් ලියන ලද  ලිපියේ සිංහල පරිවර්තනය යි. පරිවර්තනය මිගාර මල්වත්ත විසිනි. 

ඊශ්‍රායලය ගාසා තීරයේ මිනිසුන්ට එරෙහිව බෝම්බ හෙලීම, කුසගින්න සහ වාර්ගික ශුද්ධ කිරීම දිගටම කරගෙන යද්දී, කුසගින්න වසංගත මට්ටමට ළඟා වී තිබේ. එක්සත් ජාතීන්ගේ ලෝක ආහාර වැඩසටහන වාර්තා කරන ලද්දේ , ගාසා තීරයේ පුද්ගලයන් 10 දෙනෙකුගෙන් නව දෙනෙකුම කුසගින්නෙන් නින්දට යන බවයි.

ජනගහනයෙන් අඩකට වඩා – සියයට 63 කට වඩා – දින ගණනාවක් ආහාර නොමැතිව සිටින බව වාර්තා වේ. පලස්තීන සරණාගතයින් සඳහා වගකිව යුතු එක්සත් ජාතීන්ගේ සංවිධානය වන UNRWA (පලස්තීනය සඳහා එක්සත් ජාතීන්ගේ සහන සහ වැඩ නියෝජිතායතනය) ට්විටර් හි ප්‍රකාශයක ලියා ඇත්තේ,”කුසගින්න සෑම කෙනෙකුම පසුපස හඹා යයි,” “ගාසා තීරයේ බොහෝ දෙනෙක් දැන් දින දෙක තුනක් තිස්සේ ආහාර ගෙන නැත.” යනුවෙනි.

එක්සත් ජාතීන්ගේ ආහාර පිළිබඳ විශේෂ වාර්තාකරු මයිකල් ෆක්රි , අල් ජසීරා අරාබි සේවයට දුන් සම්මුඛ සාකච්ඡාවකදී, “ගාසාවේ සිටින සෑම පලස්තීනුවෙක්ම කුසගින්නේ සිටින” බව පැවසු අතර, ගාසාවේ ජනගහනය සමූල ඝාතනය කිරීම “ජන සංහාරයක්” ලෙස ඔහු විසින් හඳුන්වන ලදී. 

මෙම වාර්තා සටහන් වන්නේ, සටන් විරාමයක් සදහා ඉල්ලා සිටින එක්සත් ජාතීන්ගේ යෝජනාවක්, එක්සත් ජනපදය විසින් සිකුරාදා නිශේධ බලය යොදා ප්‍රතික්ෂේප කිරීමෙන් පසුවය. මෙම සතියේදී එක්සත් ජාතීන්ගේ මහා මණ්ඩල සැසිවාරයේදී නොබැඳි සටන් විරාම යෝජනාවක් සම්මත කිරීමට අපේක්ෂා කෙරේ. මේ අතර එක්සත් ජනපදය ජන සංහාරය විවෘතව අනුමත කරමින් අර්බුදයට “මිලිටරි” විසඳුමක් ඉල්ලා සිටීම දෙගුණ කර ඇත. 

“ඔක්තෝබර් 7 ප්‍රහාර සැලසුම් කර ක්‍රියාත්මක කළ හමාස් සංවිධානයේ නායකත්වය ඉවත් කිරීමටත්, ඊශ්‍රායලයට ඇතුළු වී එම ප්‍රහාර එල්ල කළ සටන්කාමීන් ඉවත් කර ගැනීමටත් යුදමය විසඳුමක් තිබිය හැකි යැයි අපි සිතමු,” යනුවෙන් එක්සත් ජනපද රාජ්‍ය දෙපාර්තමේන්තුවේ ප්‍රකාශක මැතිව් මිලර් දැනුවත් කිරීමකදී පැවසීය.

මෙම ප්‍රකාශය සිදුවූයේ,” හමාස් තවමත් ජීවතුන් අතර සිටිද්දී, හා තත්වය තවමත් නොවෙනස්ව පවතිදිදී, මේ මොහොතේ සටන් විරාමයක් ඇති වූවොත්, නැවත නැවතත්, ඔක්තෝබර් 7 වෙනිදා, පුනරුච්චාරණය කිරීමේ ප්‍රකාශිත අභිප්‍රාය ඇති හෙයින, සරලව, ගැටලුව දිගටම පවතිනු ඇත.” යනුවෙන් එ.ජ. රාජ්‍ය ලේකම් ඇන්ටනි බ්ලින්කන්ගේ ඉරිදා කල ප්‍රකාශයෙන් අනතුරුවය.

සඳුදා වොෂින්ටන් පෝස්ට් වාර්තා කළේ, ජනාකීර්ණ ප්‍රදේශවල ගිනි අවුළුවන සුළු [ සුදු පොස්පරස් ] අවිය භාවිතා කිරීම තහනම් කරන ජාත්‍යන්තර නීති උල්ලංඝනය කරමින්, ලෙබනනයට ප්‍රහාර එල්ල කිරීමට ඊශ්‍රායලය එක්සත් ජනපදය සැපයූ සුදු පොස්පරස් යුධෝපකරණ භාවිතා කළ බවයි. සති ගනනාවක් තිස්සේ වීඩියෝ පට වලින් පෙන්නුම් කර ඇත්තේ ඊශ්‍රායලය ජනාකීර්ණ ප්‍රදේශවලට සුදු පොස්පරස් වැසි පතිත කරන ආකාරයයි. මෙම වාර්තාව කෙරෙන්නේ, කොංග‍්රස් මණ්ඩලයේ අවසරය මග හරිමින් , ඊශ‍්‍්රායලයට ඩොලර් මිලියන 100ක් වටිනා ටැංකි පතොරම් යැවීමට  ධවල මන්දිරය විසින් සිකුරාදා නිවේදනය කිරීමෙන් පසුවය.

සඳුදා, ගාසා තීරයට බෝම්බ හෙලීමෙන් මියගිය සංඛ්‍යාව 18,205 දක්වා ඉහළ ගිය අතර, දළ වශයෙන් තවත් 7,000 ක් තවමත් අතුරුදහන් වී ඇති අතර සුන්බුන් යට වැළලී ඇත.  ජීවිතය පවත්වාගැනීමට උපකාර කිරීම සඳහා වූ සියලු යටිතල පහසුකම් විසුරුවා හැරීම මධ්‍යයේ, පලස්තීන සෞඛ්‍ය අමාත්‍යාංශය අනතුරු ඇඟවූයේ  බෝවන රෝග වලට ගොදුරු වූවන් 325,000 ක් සිටින බවයි. එයින් අදහස් කරන්නේ ගාසා තීරයේ මිනිසුන් හය දෙනෙකුගෙන් එක් අයෙකු එවැනි රෝගයකින් රෝගාතුර වී ඇති බවයි, 

දේශසීමා නොමැති වෛද්‍යවරුන් (Doctors Without Borders) සඳහා ගාසා හි හදිසි සම්බන්ධීකාරක  නිකලස් පැපක්රිසොස්ටොමෝ , අල් ජසීරා වෙත පැවසුවේ, “රෆා හි අනෙකුත් සෑම රෝගියෙකුටම වැසි සහ සීතල තත්වයන් මධ්‍යයේ ශ්වසන ආසාදන තිබේ. සමහර නවාතැන් ස්ථානවල, පුද්ගලයන් 600 ක් එක් වැසිකිළියක් බෙදා ගනී. අපි දැනටමත් බොහෝ පාචන රෝගීන්  දකිමු. බොහෝවිට වැඩිපුරම පීඩාවට පත් වෙන්නේ ළමුන්ය.” යනුවෙනි.

“දෙසැම්බර් 11 වන දින, ගාසා තීරයට උතුරින් බෙයිට් ලහියා හි කමල් ඇඩ්වාන් රෝහලේ මාතෘ අංශයට පහර වැදී ඇත. එහි ප්‍රතිඵලයක් ලෙස මව්වරුන් දෙදෙනකු මියගොස් තවත් කිහිප දෙනෙකු තුවාල ලබා ඇති” බව එක්සත් ජාතීන්ගේ සංවිධානය වාර්තා කළේය.

ලෝක සෞඛ්‍ය සංවිධානයේ විධායක මණ්ඩලය ගාසා තීරයේ සෞඛ්‍ය සේවා පද්ධතියේ සම්පූර්ණ බිඳවැටීමක් ගැන අනතුරු ඇඟවීමක් නිකුත් කළේය.  “ගාසාවේ සෞඛ්‍ය පද්ධතිය දණින් වැටී කඩා වැටෙමින් පවතින අතර, නරක අතට හැරෙන තත්ත්වය සහ සීත සෘතුව වෙත ළඟා වීමත් සමඟ අවදානම තවත් නරක අතට හැරෙනු ඇතැයි අපේක්ෂා කරන ” බව , ලෝක සෞඛ්‍ය සංවිධානයේ අධ්‍යක්ෂ ජනරාල්වරයා පැවසන ලදී.

“වැඩි වැඩියෙන් මිනිසුන් , කුඩා හා කුඩා ප්‍රදේශයකට සංක්‍රමණය වන විට, ප්‍රමාණවත් ආහාර, ජලය, නවාතැන් සහ සනීපාරක්ෂාව නොමැතිකම සමඟ ජනාකීර්ණ වීම රෝග පැතිරීමට සුදුසුම තත්වයන් නිර්මාණය කරයි,” යනුවෙන් ඔහු තවදුරටත් පැවසීය.

එක්සත් ජාතීන් වාර්තා කළේ: “වාර්තා වූ පරිදි, , ඊශ්‍රායල හමුදා විසින් උතුරේ සහ ගාසා නගරයේ ,අභ්‍යන්තරව අවතැන් වූවන් (IDPs) සඳහා නවාතැන් ලෙස සේවය කරන පාසල් මෙන්ම පෞද්ගලික නිවාස වැනි පොදු ස්ථානවල රැඳී සිටි පිරිමින් සහ පිරිමි ළමයින් සිය ගණනක් රඳවා තබා ගත් බවයි . වාර්තා වන අන්දමට, රැඳවියන්ගේ යට ඇඳුම් තෙක් ඇඳුම් ගලවා, මාංචු දමා, පහරදීම්, හිරිහැර කිරීම්, කටුක කාලගුණයට නිරාවරණය කිරීම සහ මූලික අවශ්‍යතා ප්‍රතික්ෂේප කිරීම වැනි දේවලට යටත්ව විවෘත ස්ථානවල දණින් වැටී හිඳීමට නියෝග කරන ලදී.”

හියුමන් රයිට්ස් වොච් හි ඊශ්‍රායල හා පලස්තීන අධ්‍යක්ෂ ඕමාර් ෂාකීර්,ප්‍රකාශයක් නිකුත් කරමින්,  මෙම දරුණු යුද අපරාධය හෙළා දුටුවේය. “ගාසා තීරයේ ඇඳුම් ගලවා, ඇස් බැඳ, රඳවා සිටින පලස්තීන මිනිසුන්ගේ කම්පන සහගත ඡායාරූප ඊශ්‍රායල හමුදාව විසින් ප්‍රකාශයට පත් කිරීම ‘පුද්ගලික අභිමානය පිළිබඳ කෝපය දල්වන’- යුද අපරාධයකට සමාන අමානුෂික සැලකිල්ලක්”වන අතර, ඔවුන් “අපරාධකරුවන් ලෙස ගණන් ගත යුතුයි.” යනුවෙන් සකීර් සඳුදා ලිවීය. 

ඔක්තෝබර් 7 වැනිදා සිට මේ දක්වා පලස්තීන මාධ්‍යවේදීන් 81ක් ඊශ්‍රායල ගුවන් ප්‍රහාරවලින් මිය ගොස් ඇති අතර වෛද්‍ය සේවකයන් 296ක් මිය ගොස් ඇත. සඳුදා, අල් ජසීරා මාධ්‍යවේදියෙකු වන අනාස් අල්-ෂරීෆ් අරමුනු කරගත්, උතුරු ගාසා තීරයේ ජබාලියා සරණාගත කඳවුරේ පිහිටි ඔහුගේ නිවසට බෝම්බ ප්‍රහාරයක් එල්ල කළ අතර එමඟින් ඔහුගේ පියා මිය ගියේය. අල් ජසීරා පැවසුවේ මෙම ඝාතනය සිදු වූයේ “පසුගිය නොවැම්බරයේ [අල්-ෂරීෆ්] විසින් ඔහුගේ රාජකාරිය ඉටු කිරීම වළක්වා ගැනීමේ උත්සාහයක් ලෙස ඔහුට ලැබුණු තර්ජන මාලාවකින් පසුව” බවයි.

මාධ්‍යවේදීන් ආරක්ෂා කිරීම සඳහා වූ කමිටුව ප්‍රහාරයට ප්‍රතිචාර දැක්වූයේ, “ගාසාවේ මාධ්‍යවේදීන්ට කරන තර්ජන වාර්තා කරන ආකාරය සහ පසුව ඔවුන්ගේ පවුල්වල සාමාජිකයන් මරා දැමීමේ රටාව පිළිබඳව දැඩි ලෙස තැතිගන්වන” බව ප්‍රකාශ කරමිනි. “ගාසා තීරයේ මාධ්‍යවේදීන්ගේ පවුලේ සාමාජිකයන් ඝාතනය කිරීම නිසා මාධ්‍යවේදීන්ට වාර්තා කිරීම දිගටම කරගෙන යාමට නොහැකි තරම්ය, මන්ද දැන් අවදානම ඔවුන්ගෙන් ඔබ්බට ගොස් ඔවුන්ගේ ආදරණීයයන් ද ඇතුළත් කර ගැනීමයි.” එය තවදුරටත් සදහන් කලේය.

ඊශ්‍රායලයේ සමූහ මිනීමැරුම සමූහ අවතැන් වීමත් සමඟ සිදු වේ. උතුරු ගාසා තීරයෙන් මුළු ජනගහනයටම ඉවත් වන ලෙස නියෝග කිරීමෙන් පසුව, ඊශ්‍රායල හමුදාව විසින් දකුණු ගාසා තීරයෙන් තවත් සියයට 30ක් අනිවාර්යයෙන් ඉවත් කිරීම සඳහා ලකුණු කර ඇත. ඊජිප්තුව සමඟ රෆා දේශසීමා හරස් මාර්ගය ආසන්නයේ ජරා සරණාගත කඳවුරුවල සිරවී සිටින ලක්ෂ සංඛ්‍යාත ජනතාවක් තව තවත් දකුණට ගොඩ ගැසෙමින් සිටින අතර, එමගින් ඊශ්‍රායල දේශපාලඥයින් විසින් ගාසා වැසියන් අවතැන් කරන ලෙස ඉල්ලා ඇත.

ආන්ඩ්‍රේ ඩේමන් විසිනි.

මෙහි පලවන්නේ ලෝක සමාජවාදී වෙබ් අඩවියේ 2023 නොවැම්බර් 26 දින පල වූ ‘Vast scale of Gaza genocide comes into view’ යන ආන්ඩ්‍රේ ඩේමන් විසින් ලියන ලද ඉදිරිදර්ශන ලිපියේ සිංහල පරිවර්තනය යි. පරිවර්තනය මිගාර මල්වත්ත විසිනි.

මාස දෙකක කාල පරාසයක් පුරා , ඊශ්‍රායලය විසින් සිදු කළ බෝම්බ හෙලීමේ සහ ගාසා තීරය ආක්‍රමණය කිරීමේ ප්‍රථම විවේකයෙන් දින තුනකට පසු, ලොව විශාලතම අපරාධ ස්ථානය වන ගාසා තීරයේ සිවිල් ජනතාව හිතාමතාම සමූල ඝාතනය කිරීමේ සාක්ෂි වාර්තාගත කිරීමට චිත්‍රපට කාර්ය මණ්ඩල පටන් ගෙන තිබේ.

ගාසා තීරයට එරෙහිව ඊශ්‍රායල ප්‍රහාරයේ “විරාමයක්” “මාධ්‍යවේදීන්ට ගාසා තීරයට පුළුල් ප්‍රවේශයක් ලබා දෙන අතර එහි විනාශය තවදුරටත් අනාවරණය කිරීමට සහ ඊශ්‍රායලයට එරෙහිව මහජන මතය හැරවීමට” අවස්ථාව සැලසෙනු ඇති බවට ධවල මන්දිරය “කනස්සල්ලට” පත්ව ඇති බව පසුගිය සතියේ පොලිටිකෝ ( Politico) වාර්තා කළේය.

ඉන්දුනීසියානු රෝහල විනාශ වී ඇත, එහි පරිශ්‍රයට විශාල හානියක් වී රෝගීන් ඒ තුළ සිරවී සිටී.

ඔවුන් එලෙස ම කර තිබේ. සති අන්තයේ පලවූ අල් ජසීරා හි ස්ථානීය වාර්තාවක් ගාසාහි ඉන්දුනීසියානු රෝහලේ දර්ශනය විස්තර කළ පරිදි: “මරණයේ දුර්ගන්ධය මිනිසුන්ට තම නාසය වසා ගැනීමට බල කරයි, පිළිස්සුණු, කුණුවූ මළ සිරුරු, ඔවුන් අතර සිටින දරුවන්, එක් මුල්ලක ගොඩගැසී ඇත. ඊශ්‍රායල ස්නයිපර්වරු මිනීවළක් හෑරීමට ගිය අය ඉලක්ක කළ නිසා මිහිදන් කිරීමක් සිදු වී නොමැත. වීදි, පාසල්, නිවාස, කඩ සාප්පු, ආදී සියල්ල ඊශ්‍රායල ප්‍රහාර මගින් විනාශ කර දමා ඇත.”

පලස්තීන සෞඛ්‍ය බලධාරීන් ගාසා තීරයේ මියගිය සංඛ්‍යාව ඉක්මවා සදහන් කළේ යයි, එක්සත් ජනපද ජනාධිපති ජෝ බයිඩන් කී බොරුව මෙම වාර්තා මගින් මුලුමනින්ම හෙලිදරව් කර ඇත. ඇත්ත වශයෙන්ම, බයිඩන් පරිපාලනය  නිල මරණ සංඛ්‍යාව සැලකිය යුතු ලෙස අවතක්සේරු කිරීමක් කළ බව දැන් පිළිගනී.

සෞඛ්‍ය සේවා බිඳවැටීම හේතුවෙන් ,මියගිය අය ගණන් කිරීම කළ නොහැකි වීම හේතුවෙන් ගාසා හි සෞඛ්‍ය අමාත්‍යාංශය විසින් අවසන් නිල මරණ සංඛ්‍යාව ප්‍රකාශයට පත් කර සති දෙකක් ගත වී ඇත. කෙසේ වෙතත්, බදාදා ප්‍රකාශයට පත් කරන ලද රජයේ ප්‍රවෘත්ති අමාත්‍යාංශයේ නවතම නිල නොවන ගණන් කිරීම ඇස්තමේන්තු කර ඇත්තේ ළමුන් 6,000 ක් සහ කාන්තාවන් 4,000 ක් ඇතුළුව පුද්ගලයින් 14,352 ක් මරා දමා ඇති බවයි.

පලස්තීන චිත්‍රපට නිෂ්පාදක බීසාන් ඔව්ඩා ගාසා තීරයේ සමාජ මාධ්‍ය වාර්තා කිරීම ලොව පුරා මිලියන සංඛ්‍යාත ජනතාවක් ආකර්ෂණය කරගෙන ඇති අතර, යථාර්ථය වඩාත් පැහැදිලිව පෙන්වා දෙයි: “ඔබ දැනගත යුතු ගාසාවේ සංඛ්‍යා: දින 50 ක් තුළ 20,000 ක් මිනිසුන් ඝාතනය කර ඇත – ඔවුන්ගෙන් 7,000 ක් තවමත් සුන්බුන් යට ය – ඔවුන්ගෙන් 8,000 ක් ළමයින් ය- ඔවුන් සියල්ලෝම සිවිල් වැසියෝ ය.

ගාසා හි නිලධාරීන්ට අනුව, නිවාස ඒකක 233,000 ක් හෝ ගාසා තීරයේ නිවාසවලින් අඩක් පමණ විනාශ වී හෝ හානි වී ඇත. පාසල් 266කට බෝම්බ හෝ මිසයිල ප්‍රහාර එල්ල වූ අතර ඉන් 67ක් විනාශ වී ඇත. ඊශ්‍රායලය විසින් සෞඛ්‍ය සේවා සපයන්නන් 205ක් සහ මාධ්‍යවේදීන් 64ක් මරා දමා ඇත. මරණ සංඛ්‍යාවේ වඩාත්ම කැපී පෙනෙන අංගය වන්නේ කාන්තාවන් සහ ළමුන් අතර සිදුවන දැවැන්ත මරණ පරිමානයයි.

ඉරිදා ගාඩියන් පත්‍රයේ පළ වූ ලිපියක සඳහන් වූයේ, තමන් හමාස් සටන්කරුවන් 1000ත් 2000ත් අතර ප්‍රමාණයක් මරා දැමූ බව ඊශ්‍රායලය ප්‍රකාශ කරන බවයි. මෙය සත්‍ය වුවද, එයින් අදහස් වන්නේ මරා දමන ලද සෑම සටන්කරුවෙකු සඳහාම ඊශ්‍රායලය දරුවන් තිදෙනෙකු හෝ හය දෙනෙකු මරා දමා ඇති බවත්, මියගිය අයගෙන් සියයට 85ත් 92ත් අතර ප්‍රමාණයක් සිවිල් වැසියන් බවත්ය.

මෙම ඉරිදා, නිව් යෝර්ක් ටයිම්ස් විසින් මුල් පිටුවේ පළ කළේ, ගාසා යුද්ධයේ දී කාන්තාවන් සහ ළමුන් අතර දැවැන්ත මරණ සංඛ්‍යාව පිළිබඳව සැලකීමේදී, 21 වන සියවසේ ඊට සමාන වූ පූර්වාදර්ශයක් නොමැති බවයි.

“ඊශ්‍රායලය විසින් ගාසා තීරයේ සිවිල් වැසියන්ගේ මරණ කනගාටුදායක නමුත් නූතන ගැටුමේ දී, එය නොවැළැක්විය හැකි අංගයක් බව ප්‍රකාශ කර ඇත… නමුත් අතීත ගැටුම් සමාලෝචනය කිරීම සහ තුවාල ලැබූවන් සහ ආයුධ විශේෂඥයින් සමඟ සම්මුඛ සාකච්ඡා කිරීමේදී, ඊශ්‍රායලයේ ප්‍රහාරය වෙනස් බව අදහස් කරයි.”

ද ටයිම්ස් සටහන් කලේ : “එක්සත් ජාතීන්ගේ සංඛ්‍යාලේඛනවලට අනුව, වසර දෙකකට ආසන්න රුසියානු ප්‍රහාරවලින් පසුව, යුක්‍රේනයේ මියගිය බව තහවුරු වූ ප්‍රමාණයට වඩා දෙගුණයකටත් වැඩි ප්‍රමාණයක් දැනටමත් ගාසා තීරයේ දී ඝාතනය කර ඇති” බවයි.

බොහෝ ප්‍රතිරෝධක සටන්කරුවන් පිරිමින් වුවද, ගාසා තීරයේ වාර්තා වන සියලුම මරණවලින් සියයට 70 ක් කාන්තාවන් සහ ළමයින් බව වාර්තාව තවදුරටත් පවසයි. “උදාහරණයක් ලෙස, ඊශ්‍රායලය සහ හමාස් අතර ඇති වූ අතීත ගැටුම්වලදී, ගාසා තීරයේ වාර්තා වූ මරණවලින් සියයට 60ක් පමණ පිරිමින් විය,” ටයිම්ස් ලිවීය.

ඊශ්‍රායලය රාත්තල් 2,000ක බෝම්බ භාවිතා කිරීම මගින් , 21 වැනි සියවසේ පෙර පැවති යුද්ධවල දක්නට ලැබුණු ඕනෑම දෙයක් පරයා යන බව එම ලිපියේ සඳහන් වේ. “ඊශ්‍රායලය ගාසා තීරයට හෙළන ලද යුද්ධායුධ වලින්, දළ වශයෙන් සියයට 90ක් චන්ද්‍රිකා මගින් මෙහෙයවන ලද රාත්තල් 1,000 සිට 2,000 දක්වා බරැති බෝම්බ” බව එක්සත් ජනපද හමුදා නිලධාරියෙකු උපුටා දක්වමින් ටයිම්ස් වාර්තා කරයි.

ටයිම්ස් මෙසේ ලියයි: “ ඊට වෙනස්ව, මෙම ශතවර්ෂයේ සටන්වලදී, එක්සත් ජනපද හමුදා නිලධාරීන් බොහෝ විට විශ්වාස කළේ, ඉරාකයේ මොසුල් සහ සිරියාවේ රක්කා වැනි නාගරික ප්‍රදේශවල ඉස්ලාමීය රාජ්‍යයට [ IS සංවිධානය] එරෙහි සටන්වලදී වඩාත් සුලභව යොදාගත් ඇමරිකානු ගුවන් බෝම්බ—රාත්තල් 500ක් බරැති— බොහෝ ඉලක්ක වල ප්‍රමාණයට වඩා විශාල වූ බව ය.

ටයිම්ස් ලිපිය, එය ප්‍රකාශයට පත් කරන සෑම දෙයක් මෙන්ම, ඇමරිකානු රාජ්‍ය අවශ්‍යතා ආරක්ෂා කිරීම සඳහා සකස් කර පරීක්ෂා කර ඇත. සිවිල් ජනතාව හිතාමතා ඉලක්ක කිරීම මගින් පමණක් පැහැදිලි කළ හැකි සංඛ්‍යාලේඛන ඉදිරිපත් කරන අතර, ටයිම්ස් මෙම ක්‍රියාවන් පලස්තීන සිවිල් වැසියන් ඝාතනය කිරීම බව පුන පුනා ප්‍රකාශ කරන ඊශ්‍රායල නිලධාරීන්ගේ ප්‍රකාශවලට කිසිවිටෙක සම්බන්ධ නොකිරීමට වගබලා ගනී.

මේ මස මුලදී, ඊශ්‍රායල ජනාධිපති අයිසැක් හර්සොග්, “එහි සමස්ත ජාතියම වගකිව යුතු ය… සිවිල් ජනතාව දැනුවත් නොවීම සහ සම්බන්ධ නොවී සිටීම පිළිබඳ මෙම වාචාල කතාව සත්‍ය නොවේ. එය සම්පූර්ණයෙන්ම සත්‍යය නොවේ.”යනුවෙන් දකුණු ඊශ්‍රායලයේ ඔක්තෝබර් 7 ප්‍රහාරයට ගාසා තීරයේ සමස්ත ජනතාවම වගකිව යුතු බව ප්‍රකාශ කළේය.

“එය මහජනතාව නීත්‍යානුකූල ඉලක්ක බවට පත් කරනු ලබත් ද?” යනුවෙන් ඇසූ විට, හර්සොග් පිළිතුරු දුන්නේ, “ඔබේ මුලුතැන්ගෙයි මිසයිලයක් තිබෙන විට සහ ඔබට එයින් මට වෙඩි තැබීමට අවශ්‍ය වූ විට, මා ආරක්ෂා කර ගැනීමට මට අවසර තිබේද?” යනුවෙනි.

පසුගිය මාසයේ ඊශ්‍රායල අගමැති බෙන්ජමින් නෙතන්යාහු ප්‍රකාශ කළේ, “අමලෙක් ඔබට කළ දේ ඔබ මතක තබා ගත යුතුයි”, “පිරිමියන් සහ ගැහැනුන්, ළමයින් සහ ළදරුවන්, ගවයන් සහ බැටළුවන්, ඔටුවන් සහ කොටළුවන් මරා දමන්න” යන බයිබලියානුකුල කොටසට ආයාචනා කරමිනි.

“අපි මිනිස් සතුන් සමඟ සටන් කරනවා, අපි ඒ අනුව ක්‍රියා කරනවා,” ආරක්ෂක අමාත්‍ය යොආව් ගැලන්ට් පසුගිය මාසයේ පැවසීය.

එක්සත් ජාතීන්ගේ මානව හිමිකම් පිළිබඳ මහ කොමසාරිස්ගේ නිව්යෝර්ක් කාර්යාලයේ හිටපු අධ්‍යක්ෂ ක්‍රේග් මොකිබර් පැහැදිලි කළ පරිදි: “ඊශ්‍රායල් ආන්ඩුවේ සහ හමුදාවේ නායකයින්ගේ පැහැදිලි ප්‍රකාශයන්, ඔවුන්ගේ අභිප්‍රාය  සැකයකට හෝ විවාදයකට ඉඩ නොතබයි,” එනම් ඊශ්‍රායලය “පොතේ හැටියට” සමූල ජන ඝාතනයේ යෙදී ගෙන ඇති බවයි.

වෙනත් වචන වලින් කිවහොත්, “ඊශ්‍රායලයේ ප්‍රහාරය මීට පෙර පැවති යුද්ධවලට වඩා වෙනස් ය” යන භාෂාව ටයිම්ස් විසින් භාවිතා කිරීම හුදෙක් සිවිල් ජනතාව අතර මරණ පරිමාණය පමණක් නොව,හිතාමතාම හැකිතාක් සිවිල් වැසියන් මරා දැමීමේ අරමුණක් ඇති බව පිළිගැනීමට ඊශ්‍රායල නිලධාරීන්ගේ කැමැත්ත ප්‍රකාශ කරයි. 

එපමනක් නොව, ඊශ්‍රායලය සිදු කර ඇති සෑම දෙයක්ම, එය බයිඩන් පරිපාලනය සමඟ සම්බන්ධීකරණය කර ඇත. එය විසින් ගාසා තීරයට හෙළා ඇති රාත්තල් 2000ක බෝම්බ සියල්ලම එක්සත් ජනපදයේ නිෂ්පාදිත ඒවා වන අතර පෙන්ටගනය විසින් සපයන ලදී. ඊශ්‍රායලයේ සහ එක්සත් ජනපද අධිරාජ්‍යවාදයේ ආස්ථානයෙන්, “විරාමයේ” එක් අරමුනක් වන්නේ බිඩෙන් පරිපාලනය උනන්දුවෙන් ක්‍රියාත්මක කරන ඊශ්‍රායල මිලිටරියට යලි [ අවි ආයුධ] සැපයීමයි.

මේ අතර, ටයිම්ස් පුවත්පත ගාසා තීරයේ ජනගහනයට එරෙහි ඊශ්‍රායලයේ ප්‍රහාරය ඉරාකය සහ ඇෆ්ගනිස්ථානය තුල එක්සත් ජනපද ආක්‍රමණයෙන් ඈත් කිරීමට උත්සාහ කරන අතර, ගාසාවේ ජන සංහාරය සනිටුහන් කරන්නේ එක්සත් ජනපද අධිරාජ්‍යවාදයේ අපරාධවල දිගුවක් හා ප්‍රසාරනයකි. මෙම යුද්ධය මිලියන 1 කට අධික ජනතාවක් මරා දැමූ අතර රාජ්‍ය ප්‍රතිපත්තිය ලෙස ඊට පැහැර ගැනීම සහ ස්ත්‍රී දූෂණය භාවිතා කිරීම ඇතුලත් විය.

මෙම දැවැන්ත අපරාධ සඳහා සිරගත වීම තබා, තේරී පත් වූ එකදු නිලධාරියෙකුට හෝ හමුදා නිලධාරියෙකුට චෝදනා එල්ල නොවීය. දැන්, ගාසා තීරයේ විනාශයේ දසුන් පෙන්නුම් කරන පරිදි, එක්සත් ජනපදය හා ලෝක අධිරාජ්‍යවාදය ඊටත් වඩා විශාල පරිමාණයෙන් අපරාධ සිදු කරමින් සිටින අතර අනාගතය සඳහා තවත් විශාල අපරාධ සූදානම් කරමින් සිටී.

ගාසා තීරයේ ජන සංහාරය නැවැත්වීමට සමාජවාදී ඉදිරිදර්ශනයකින් සන්නද්ධ ජාත්‍යන්තර කම්කරු පන්තියේ මහා යුද විරෝධී ව්‍යාපාරයක් ගොඩනැගීම අවශ්‍ය වේ. මෙම ව්‍යාපාරයේ ප්‍රධාන ඉල්ලීමක් විය යුත්තේ, ඊශ්‍රායල සිවිල් සහ හමුදා නිලධාරීන් පමණක් නොව, වොෂින්ටන්, පැරිස්, ලන්ඩන් සහ බර්ලිනයේ නායකයින් ද ඇතුළුව මෙම යුද අපරාධවලට වගකිව යුතු අය යුද අපරාධ සම්බන්ධයෙන් නඩු කටයුතු වලට යටත්  කිරීමයි.

ඇන්ඩෘ ඩැමන් විසිනි.

මෙහි පලවන්නේ ලෝක සමාජවාදී වෙබ් අඩවියේ 2023 ඔක්තෝබර් 24 දින පල වූ “US inflames war throughout the Middle East” යන  ඇන්ඩෘ ඩැමන් විසින් ලියන ලද ඉදිරිදර්ශන ලිපියේ සිංහල පරිවර්තනය යි. පරිවර්තනය  කිත්රුවන් මොලදණ්ඩ විසිනි.

පසුගිය විසිපස් වසර තුල දී,  මැද පෙරදිග නීතිවිරෝධී යුද්ධ වලින් මිලියනයකට වඩා මිනිසුන් ඝාතනය කර ඇති එක්සත් ජනපදය, කලාපය පුරා පුලුල් යුද්ධයක් අවුලුවාලීම සඳහා පලස්තීනුවන්ට එරෙහි ඊශ්‍රායලයේ ප්‍රහාරය භාවිතා කරයි.

එක්සත් ජනපදය මැද පෙරදිගට හමුදා, යුද නැව් සහ ගුවන් යානා එවීම වැඩි කර ඇත. අවම වශයෙන් නැවියන්, සොල්දාදුවන් සහ ගුවන් භටයන් 10,000ක් දැනටමත් කලාපයට යොදවා ඇති අතර, නිශ්චිත නොවන භට පිරිසක්-සමහර විට දස දහස් ගනනක් – යෙදවීමට සූදානම් වන බව දන්වා ඇත.

සෑම දිනකම පුද්ගලයන් 300 ත් 400 ත් අතර සංඛ්‍යාවක් ඝාතනය කිරීම මෙන්ම හිතාමතාම   ජනගහනය විජලනයට පත් කිරීම, සාගින්නෙන් පෙළීමට සැලැස්වීම සහ  සිවිල් වැසියන්ට විශාල බෝම්බ හෙලීම  සිදුවෙමින් පවතින, පලස්තීනුවන්ට එරෙහි ඊශ්‍රායලය විසින් සිදු කරනු ලබන ජන සංහාරයට බයිඩන් පරිපාලනය සිය පූර්ණ සහයෝගය ලබා දී ඇත.

ඒ අතරම, එය ඊශ්‍රායලයට ලෙබනනය, සිරියාව සහ බටහිර ඉවුර වෙත එකවර ප්‍රහාර එල්ල කිරීමට  ආයුධ සපයයි.

ඇමරිකානු අවි භාවිතා කරමින් සහ ඇමරිකානු දේශපාලන, මිලිටරි සහ සැපයුම් ආධාර ඇතිව පලස්තීනුවන්ට එරෙහිව ඊශ්‍රායලය සිදු කරන ජන සංහාරය, කලාපය පුරා එක්සත් ජනපද මිලිටරි උත්සන්න කිරීමේ එක් අංගයක් පමනි.

සෙනසුරාදා ආරක්ෂක ලේකම් ලොයිඩ් ඔස්ටින් විසින් “ඉරානයේ උත්සන්න කිරීම්” උපුටා දක්වමින් , එක්සත් ජනපද මිලිටරිය “කලාපය තුළ පෙනී සිටීම ” “ශක්තිමත් කිරීමේ” පියවර නිවේදනය කලේය. ඔස්ටින් පැවසුවේ තමා කලාපය පුරා එක්සත් ජනපද මිසයිල ආරක්ෂක පද්ධති සීරුවෙන් තබන බවත්, “අතිරේක බලකා සංඛ්‍යාවක් යෙදවිමට සූදානමේ-අන මත තබා ඇති” බවත්ය.

පසුගිය සතිය පුරා ඉරාකයේ ස්ථානගත කර ඇති එක්සත් ජනපද හමුදා,  ඉරාන ප්‍රොක්සි හමුදා යැයි කියා ගන්නා හමුදාවන්ගේ ප්‍රහාරයන්ට ලක්ව ඇති බව එක්සත් ජනපද හමුදාව ප්‍රකාශ කර ඇත.

“ඉරානය මෙම සිදුවීම් සමීපව නිරීක්ෂණය කරමින් සිටින සිටී. සමහර අවස්ථාවලදී, මෙම ප්‍රහාර සඳහා ක්‍රියාකාරීව පහසුකම් සපයන අතර මෙම ගැටුම, තම යහපත සඳහා 

යොදා ගැනීමට කැමති අන් අය පෙළඹවීම හෝ ඉරානයේම අවශ්‍යතා සඳහා යොදා ගන්නා” බව පෙන්ටගනයේ ප්‍රකාශක ජෝන් කර්බි සඳුදා පැවසීය.

ඉරිදා සම්මුඛ සාකච්ඡාවකදී රාජ්‍ය ලේකම් ඇන්ටනි බ්ලින්කන් ප්‍රකාශ කළේ, “ඉරාන ප්‍රොක්සින්  විසින් අපගේ හමුදාවන්ට , අපගේ පිරිස්වලට එරෙහිව එල්ල කරන ලද ප්‍රහාර උත්සන්න වීමේ සම්භාවිතාවක් ඇතැයි අපි අපේක්ෂා කරමු. අපගේ ජනතාව ඵලදායී ලෙස ආරක්ෂා කිරීමට සහ අපට අවශ්‍ය නම් තීරණාත්මක ලෙස ප්‍රතිචාර දැක්විය හැකි බවට වග බලා ගැනීමට අපි පියවර ගනිමින් සිටිමු.”

බ්ලින්කන් අවධාරනය කලේ, “මෙය අපට අවශ්‍ය දේ නොවේ, අප සොයන දෙය නොවේ. අපට උත්සන්න කිරීම අවශ්‍ය නැත. ” ඔහු තවදුරටත් පැවසුවේ, “අපි කලාපයට ඉතා වැදගත් වත්කම් යොදවා ඇත, ගුවන් යානා වාහක යුධ කණ්ඩායම් දෙකක්, කුපිත කිරීමට නොව, වළක්වා ගැනීමටය.”

හැම විටම වාාගේ, බ්ලින්කන් බොරු කියයි. මැදපෙරදිග, හමුදා සහ අවි ආයුධ මගින් සිදු කරනු ලබන ගිල ගැනීම මගින්, මෙම උත්සන්න වීම එක්සත් ජනපදයේ පැත්තෙන් සිදු කරයි.

එක්සත් ජනපදය, එහි ප්‍රොක්සියක් වන ඊශ්‍රායලය මගින්, හිතාමතාම ඉරානය කුපිත කිරීමේ  උත්සාහයක් ලෙස ගාසා, බටහිර ඉවුර, ලෙබනනය සහ සිරියාවට බෝම්බ හෙලයි. එය යුධ නෞකා සහ ගුවන් යානා මගින් ඉරානය වටකරමින් සිටින අතර ඔවුන්ට එරෙහි ඕනෑම ප්‍රහාරයක් ඉරානයට පහර දීමට කඩතුරාවක් ලෙස යොදා ගන්නා බවට තර්ජනය කරයි.

2003 දී, එක්සත් ජනපදය විසින් සිදු කළ, ම්ලේච්ඡ සහ නීතිවිරෝධී ඉරාක ආක්‍රමණයෙන් පසුව ඉරාකය තුළ  හමුදා දහස් ගණනක් නඩත්තු කරයි. සිරියානු ආන්ඩුවට එරෙහිව එක්සත් ජනපද හමුදා ඒ හා සමානව සිරියාවේ නීති විරෝධී ලෙස යොදවා ඇත. මේ සියලු හමුදා මොහොතකින් ඉරානයට පහර දීමට සූදානමින් සිටිති.

ඊශ්‍රායල නිලධාරීහු ලෙබනනයට එරෙහිව දිගින් දිගටම තර්ජන කරති. ඉරිදා , ලෙබනන්  දේශසීමාවේ , භට පිරිස් සමඟ සංචාරයක යෙදී සිටියදී, ඊශ්‍රායල අගමැති බෙන්ජමින් නෙතන්යාහු “හිස්බුල්ලා සංවිධානයට සහ ලෙබනන් රාජ්‍යයට ඇති වීමට නියමිත විනාශකාරී ප්‍රතිවිපාක” ගැන අනතුරු ඇඟවීය, “අපි එයට සිතාගත නොහැකි බලයකින් එයට පහර දෙන්නෙමු.” ඊශ්‍රායලය සිය උතුරු දේශසීමාවෙන් 200,000 කට අධික පිරිසක් ඉවත් කිරීමට නියෝග කර ඇත.

ඉරිදා, ඊශ්‍රායලයේ ආර්ථික ඇමති නිර් බාර්කැට් තර්ජනය කලේ, යුද්ධය ලෙබනනය තුලට පැතිර ගියහොත්, “අපි එම පෙරමුණුවලට පමණක් ප්‍රතිප්‍රහාර එල්ල නොකරමු, නමුත් අපි ඉරානය නම් සර්පයාගේ හිස වෙතට යමු” යනුවෙනි.

මේ අතර එක්සත් ජනපදය හා අනෙකුත් අධිරාජ්‍යවාදී මාධ්‍ය ඉරානය සමග සෘජු මිලිටරි ගැටුමක් සඳහා උද්ඝෝෂණ කරමින් සිටී. ද ඉකොනොමිස්ට් හි ප්‍රධාන ලිපියක, මෑත පෙරදිග කටයුතු සඳහා එක්සත් ජනපදයේ හිටපු සහකාර රාජ්‍ය ලේකම් ඩේවිඩ් ෂෙන්කර් ඉරානය සමඟ මිලිටරි ගැටුමක් විවෘතව ඉල්ලා සිටියේය. “කෙසේ වෙතත්, මූල්‍ය මෙවලම්වලට වඩා ඵලදායී වන්නේ මිලිටරි ශක්තියයි. … අවාසනාවකට මෙන්, ගාසා තීරයේ යුද්ධය පුලුල් වීම වැලැක්වීමට වොෂින්ටනයට මිලිටරිමය වශයෙන් සම්බන්ධ වීම හැර වෙනත් විකල්පයක් තිබිය නොහැක.”

බ්‍රහස්පතින්දා ඔහුගේ ප්‍රයිම්-ටයිම් ( ශ්‍රාවකත්වය උපරිම වන වේලාව) කතාවේදී, බයිඩන් ඇමරිකානු ගෝලීය ආධිපත්‍යය පිළිබඳ ගැලවුම්කාරී දැක්මක් ඉදිරිපත් කළේ, ඇමරිකානු මිලිටරි හා ආර්ථික අධිපතිත්වය ලෝකයේ එක්සත් කිරීමේ මූලධර්මය බව ප්‍රකාශ කරමිනි. “ඇමරිකානු නායකත්වය ලෝකය එකට තබා  ගනී” බයිඩන් පැවසීය.

පසුදා පැවති ප්‍රචාරක පිළිගැනීමේ උත්සවයකදී ඔහු වඩාත් පැහැදිලි ලෙස ප්‍රකාශ කළේ, “අපි වසර 50ක් පශ්චාත් යුධ සමයක සිටියෙමු. එහිදී එය ඉතා හොඳින් ක්‍රියාත්මක විය. නමුත් එය යම් ආකාරයකට වාෂ්ප වී ඇත. එය ලෝක පර්යායක් වූවාක් මෙන්, එක් අර්ථයකින් නව ලෝක පර්යායක් අවශ්‍ය වේ.”

“පශ්චාත් යුධ සමය” අවසන් බව පැවසීම ලෝක යුද්ධයේ නව කාල පරිච්ඡේදයක් ප්‍රකාශ කිරීමකි. බයිඩන් පරිපාලනය මැද පෙරදිග යුද්ධය උත්සන්න කරමින්, නැගෙනහිර යුරෝපයේ සිට මැද පෙරදිග හා පැසිෆික් කලාපය දක්වා විහිදෙන ලෝක ආධිපත්‍යය සඳහා ලොව පුරා පැතිර යන ගැටුමක් ලෙස එය දකින දෙයෙහි කොටසක් වශයෙන් ඉරානයට සෘජුවම පහර දෙන බවට තර්ජනය කරයි. චීනයේ ආර්ථික නැගීම හා එක්සත් ජනපද ආර්ථිකයේ ගෝලීය පරිහානිය සමඟ මුහුන දී සිටින ඇමරිකානු අධිරාජ්‍යවාදය, ලෝක ආධිපත්‍යය තහවුරු කිරීමේ මාධ්‍යයක් ලෙස යුද්ධය දකී.

එක්සත් ජනපදය, “රුසියාව දුර්වල  කිරීම” ඉලක්ක කරගත් ප්‍රොක්සි ගැටුමකට මොස්කෝව ඇද ගැනීමේ අරමුන ඇතිව යුක්රේනයේ යුද්ධය අවුලුවාලීමට ක්‍රියා කළේය. එහෙත් වසර දෙකකට පසුව, යුක්රේනයේ නවතම ප්‍රහාරය අසාර්ථක වී ඇති අතර, රුසියාවට “මූලෝපායික පරාජයක්” ලබා දීම සඳහා එක්සත් ජනපදය ගැටුම උත්සන්න කිරීමට මංමුලා සහගත ලෙස උත්සාහ කරයි. ඒ අතරම, වොෂින්ටනය, තායිවානය සම්බන්ධ කර ගනිමින්, චීනය සමඟ ගැටුමක් අවුලුවාලන අතර, දියුණු පරිගණක තාක්‍ෂණයට එහි [ චීන] ප්‍රවේශය අවහිර කරමින්, ආර්ථික වශයෙන් චීනයේ ගෙල සිර කිරීමට උත්සාහ කරයි.

පසුගිය සතියේ, මෙම සියලු පෙරමුනු සඳහා අතිරේක මිලිටරි වියදම් සඳහා ඩොලර් බිලියන 105 ක් සඳහා  බයිඩන් විසින් කරන ලද ඉල්ලීම, ඇත්ත වශයෙන්ම, තුන්වන ලෝක යුද්ධයක ආරම්භක අදියරයන් උත්සන්න කිරීමේ ප්‍රධාන පියවරක් සලකුනු කරයි.

එක්සත් ජනපදය න්‍යෂ්ටික සන්නද්ධ බලවතුන් වන රුසියාව සහ චීනය සමඟ ගැටෙමින් සිටී. ඊශ්‍රායලය සතුව න්‍යෂ්ටික අවි ද ඇති අතර, අවම වශයෙන් ඊශ්‍රායලයේ පාර්ලිමේන්තු මන්ත්‍රීවරයෙකු වන රිවිටාල් ” ටැලි” ගොට්ලිව් ( Revital  “Tally” Gotliv ) වත්මන් ගැටුමේදී “ඩූම්ස්ඩේ ආයුධය” [න්‍යෂ්ටික අවිය] භාවිතා කරන ලෙස ඉල්ලා ඇත. මෙසේ, වොෂින්ටනයේ මිලිටරි ප්‍රචණ්ඩත්වය උත්සන්න වීම මානව ශිෂ්ටාචාරයේ පැවැත්මට තර්ජනය කරයි.

එහෙත් ඇමරිකානු අධිරාජ්‍යවාදය ලෝක යුද්ධය අවුලුවාලීම පුලුල් මහජන විරෝධයට මුහුන දෙයි. පසුගිය සති අන්තය පුරා, පලස්තීනුවන්ට එරෙහි එ.ජ.-ඊශ්‍රායල් ජන සංහාරයට එරෙහිව ජනාකීර්ණ සෑම මහාද්වීපයකම මිලියන ගනන් ජනයා උද්ඝෝෂන පැවැත් වූහ. ලන්ඩනයේ දී, 2003 ඉරාකය ආක්‍රමණය කිරීමෙන් පසු නගරයේ පැවැත්වූ  විශාලතම යුද විරෝධී රැලියට 300,000 ජනයා සහභාගී වූහ.

මෙම වර්ධනය වෙමින් පවතින යුද විරෝධී ව්‍යාපාරය ගැඹුරු කර පුළුල් කළ යුතුය. යුද්ධයට එරෙහිව වැඩෙන ව්‍යාපාරය තම රැකියා, වැටුප් සහ ජීවන තත්වයන් ආරක්ෂා කර ගැනීම සඳහා සටන් කරන කම්කරුවන්ගේ ගෝලීය වැඩවර්ජන ව්‍යාපාරය සමග ඒකාබද්ධ කල යුතුය. මේ සඳහා ධනේශ්වර ලාභ පද්ධතියට එරෙහි විරුද්ධත්වය සමග යුද්ධයට එරෙහි සටන ඒකාබද්ධ කරමින් කම්කරු පන්තිය තුල සමාජවාදී නායකත්වයක් ගොඩනැගීම අවශ්‍ය වේ.