එ.ජ, යුරෝපීය බලවතුන් ඊශ්රායල සමූහ ඝාතනයට මුලුමනින්ම සම්බන්ධ වෙයි
ලෝසවෙඅ ජාත්‍යන්තර කර්තෘ මණ්ඩලය විසිනි.
මෙහි පලවන්නේ ලෝක සමාජවාදී වෙබ් අඩවියේ 2023 ඔක්තෝබර් 12 දින පල වූ ‘US, ‘European powers fully implicated in Israeli mass murder’ යන ලෝක සමාජවාදී වෙබ් අඩවියේ (ලෝසවෙඅ) ජාත්‍යන්තර කර්තෘ මන්ඩලයේ ඉදිරිදර්ශන ලියවිල්ලේ සිංහල පරිවර්තනය යි.
theSocialist.LK කර්තෘ මන්ඩලය හා කමිටුව ලෝසවෙඅ ජාත්‍යන්තර කර්තෘ මන්ඩලයේ මෙම ප්‍රකාශය ඒ ආකාරයෙන්ම සම්මත කරන අතර අප පාඨකයන්ට ආරාධනා කරන්නේ එය අපගේම ප්‍රකාශයක් ලෙස පිලිගන්නා ලෙසත් ඒ අනුව දේශපාලනික බලමුලු ගැන්වෙන ලෙසත්ය.
ලෝක සමාජවාදී වෙබ් අඩවිය ජාත්‍යන්තර කර්තෘ මණ්ඩලය, එක්සත් ජනපදයේ සහ සියලු අධිරාජ්‍යවාදී බලවතුන්ගේ පූර්න සහයෝගය ඇතිව දැන් ගාසා තීරය තුළ ක්‍රියාත්මක වන මිනීමැරු ප්‍රහාරය මගින් , ඊශ්රායල පාලන තන්ත්රය විසින් සිදු කරනු ලබන යුද අපරාධ හෙලා දකී. මෙම යුද අපරාධ නතර කරන ලෙස ඉල්ලා විරෝධතා බලමුලු ගන්වන ලෙස අපි ලොව පුරා කම්කරුවන්ගෙන් හා තරුනයන්ගෙන් ඉල්ලා සිටිමු.
ඊශ්රායල ප්රහාරයේ අරමුන වන්නේ හැකිතාක් පලස්තීනුවන් මරා දැමීම සහ ගාසා තීරය අක්‍රිය හා වාසයට නුසුදුසු තත්ත්වයට පත් කිරීමයි. නෙතන්යාහු තන්ත්රය ගාසා තීරය මිහිතලයෙන් අතුගා දැමීමට අදහස් කරන බව, උතුරු ගාසා තීරයේ වෙසෙන මිලියන 1.1ක ජනතාවට පැය 24ක් ඇතුළත ඉවත් වන ලෙස ඊශ්රායලය විසින් ඉල්ලා සිටින බ්‍රහස්පතින්දා පස්වරුවේදී දෙන ලද නිවේදනයෙන් තහවුරු වූ කරුණයි. එය ඇත්ත වශයෙන්ම, ගාසා හි වැසියන් මරනය සදහා කැදවාගෙන යන පා ගමනක යෙදවීමයි.
මෙය ජන සංහාරක ව්‍යාපෘතියකි. ලොව වැඩිම ජන ඝනත්වයක් ඇති ගාසා තීරයේ මිලියන 2.2 ක ජනතාවක් සිටිති. ජනගහනයෙන් අඩක්, එනම් මිලියනයක් පමණ වයස අවුරුදු 18 ට අඩු ය. ඊශ්‍රායලයට සහ ඊජිප්තුවට දේශසීමා හරස් මාර්ග වසා දැමීමත් සමඟ පිටව යාමේදී උගුලට හසු වූ ඔවුහු ක්‍රමානුකූලව සාගින්න, නිරන්තර බෝම්බ හෙලීම සහ ආසන්න ආක්‍රමණයක අපේක්ෂාවකට මුහුන දෙති.
ගාසා තීරයේ සෙනසුරාදා සිය ම්ලේච්ඡ ප්‍රහාරය දියත් කළ දා සිට ඊශ්රායල ආරක්ෂක හමුදා ටොන් 4,000ක් පමණ බරැති බෝම්බ 6,000ක් පලස්තීනුවන් සදහා වෙන් කළ ප්‍රදේශ වෙත හෙළා ඇත. පලස්තීන සෞඛ්‍ය බලධාරීන්ට අනුව පුද්ගලයන් 1,417 ක් මිය ගොස් ඇති අතර ඉන් අඩක් කාන්තාවන් සහ ළමුන් වන නමුත් මරණ සංඛ්‍යාව නිසැකවම ඊටත් වඩා වැඩි ය. AP පුවත් සේවය විසින් උතුරු ගාසා තීරයේ ජබාලියා සරණාගත කඳවුරේ වීඩියෝව නිකුත් කරන ලද අතර 116,000 ක ජනගහනයක් වර්ග කිලෝමීටර් 1.4 ක අසුරා ඇත. ඊශ්රායල ගුවන් ප්රහාර මගින් කඳවුර “බිමට සමතලා කර” ඇති බව AP පුවත් සේවය සඳහන් කළේය.
නෙතන්යාහු තන්ත්රය ගාසා තීරයට විදුලිය, ජලය සහ ඉන්ධන සැපයීම ආදී සියලු දේ කපා හැර , එහි වැසියන් සාමූහික දඩුවමකට යටත් කර ඇත. එයම යුද අපරාධයකි. ජාත්‍යන්තර රතු කුරුස කමිටුව බ්‍රහස්පතින්දා අනතුරු ඇඟවූයේ ඔවුන්ගේ ඉන්ධන බලයෙන් ක්‍රියාත්මක වන ජනක යන්ත්‍ර අවසන් වීමත්, ඊශ්රායලය බරපතල ලෙස රෝගාතුර වූවන් සහ තුවාල ලැබූවන් ඉවත් කිරීම සඳහා මානුෂීය කොරිඩෝව විවෘත කිරීම ප්‍රතික්ෂේප කිරීමත් සමඟ “රෝහල් මෘත ශරීරාගාර” බවට පත්වීමේ අවදානමක් ඇති බවයි. ළදරුවන් සහ වැඩිහිටි රෝගීන් සඳහා ජීවිත ආධාරක වන ඉන්කියුබේටර් අක්‍රිය කර ඇත.
ඊශ්රායල දේශපාලන සංස්ථාපිතය පුරා පැතිර යන ලොමුදැහැගැන්වෙන ප්‍රකාශයන් පැහැදිලි කරන්නේ මෙම බිහිසුණු ක්‍රියාවන්, සමූහ ඝාතන මෙහෙයුම ලෙස වඩාත් හොඳින් විස්තර කළ හැකි දෙයෙහි ආරම්භය පමනක් බවයි.
විපක්ෂ නායක බෙනී ගැන්ට්ස් සමඟ හදිසි ආණ්ඩුවක් තහවුරු කිරීමෙන් පසු බදාදා කතා කරමින් නෙතන්යාහු ප්‍රකාශ කළේ “සෑම හමාස් මිනිසෙක්ම මියගිය මිනිසෙක්” බවයි. සෙනසුරාදා ඊශ්‍රායලයට එල්ල කළ ප්‍රහාරයට නායකත්වය දුන් සටන්කාමී ජාතිකවාදී කන්ඩායම, 2006 මැතිවරනයේදී 400,000 කට අධික ගාසානුවන්ගේ සහයෝගය දිනා ගත් හෙයින්, නෙතන්යාහුට සිය තර්ජනය ක්‍රියාත්මක කිරීම සඳහා සිය දහස් ගණනින් ඝාතනය කිරීමට අණ කිරීමට සිදුවන බව අවධාරනය කෙරුනි. එය “යුද්ධයට කාලය” බවත් ඊශ්රායලය “පෘථිවියෙන් හමාස් සංවිධානය අතුගා දැමීමට” අදහස් කරන බවත් ප්‍රකාශ කිරීමෙන් ගැන්ටිස් තම ලේ පිපාසිත බව ඊට අඩු නොවන බව පෙන්වීය.
මේවා නියුරම්බර්ග්හිදී එල්ලා මරා දැමූ ජර්මනියේ නාසි පාලන තන්ත්‍රයේ නායකයින්ගේ ප්‍රකාශයන් ප්‍රතිරාවය කරන ප්‍රකාශ වේ. 1943 මුල් භාගයේදී වෝර්සෝ ගෙටෝහි යුදෙව්වන් නාසි ආක්‍රමණයට එරෙහිව නැගී සිටි අතර, ඉන් වසරකට පසුව පෝලන්ත ප්‍රතිරෝධයෙන් අනතුරුව හිට්ලර්ගේ පාලන තන්ත්රය දැන් එහි මුල් අවධියේ පවතින ගාසා තීරයේ විනාශය හා සැසඳිය හැකි ආකාරයට නගරය සමතලා කළේය.
බයිඩන් පරිපාලනය සහ මාධ්‍ය, ඝාතනය යුක්තිසහගත කරමින්, ඊශ්රායල සිවිල් වැසියන්ට එරෙහි හමාස් ප්‍රහාරය පැහැදිලි කළ නොහැකි සාහසිකත්වයක් ලෙස හුවා දැක්වීමට උත්සාහ කරන අතර, එය අන් කිසිවක් නොව “පූර්ණ නපුර” ප්‍රකාශ කරන බව පවසයි. එහෙත් සත්‍යය නම්, ඊශ්රායල රජය විසින් පලස්තීනුවන්ට එරෙහිව දශක ගනනාවක නිර්දය මර්දනය විසින් කැරැල්ල අවුලුවාලීමයි.
යන්තම් මාස දෙකකට පෙර, ලොව පුරා සිටින ප්රධාන වශයෙන් යුදෙව් මහජන බුද්ධිමතුන් තුන්දහසකට ආසන්න පිරිසක් හමාස් ප්‍රහාරයට පෙර පැවති කොන්දේසි විස්තර කරන “කාමරය තුල අලියා” යන මාතෘකාව යටතේ ලිපියකට අත්සන් තැබූහ. ඔවුන් සඳහන් කළේ ඊශ්රායලය විසින් මෑතදී අධිකරණයට එල්ල කළ ප්‍රහාරය සහ වාඩිලාගෙන සිටින පලස්තීන ප්‍රදේශයේ පලස්තීනුවන් නීති විරෝධී ලෙස කොටුකිරීම අතර ඇති සෘජු සම්බන්ධතාවයයි. පලස්තීන ජනතාවට ඡන්දය ප්‍රකාශ කිරීමේ සහ විරෝධතා දැක්වීමේ අයිතිය ඇතුළු මූලික අයිතිවාසිකම් සියල්ලම පාහේ නොමැත. ඔවුන් නිරන්තර ප්‍රචණ්ඩත්වයට මුහුන දෙයි: මෙම වසරේ පමණක් ඊශ්රායල හමුදා, බටහිර ඉවුරේ සහ ගාසා තීරයේ පලස්තීනුවන් 190කට අධික සංඛ්‍යාවක් ඝාතනය කර ඇති අතර ගොඩනැගිලි 590කට අධික ප්‍රමාණයක් කඩා බිඳ දමා ඇත. පදිංචිකරුවන්ගේ කණ්ඩායම් කරන පුළුස්සා දැමීම්, කොල්ලකෑම් සහ ඝාතනයන්ට දඬුවම් නොලැබේ.
ලිපියේ තව දුරටත් විස්තර කර ඇති පරිදි ” පලස්තීනුවන් වර්ණභේදවාදී පාලනයක් යටතේ ජීවත් වන තාක් ඊශ්රායලයේ යුදෙව්වන්ට ප්‍රජාතන්ත්‍රවාදය පැවතිය නොහැක. නීති විවිශාරද යින් මෙය විස්තර කර ඇත. ඇත්ත වශයෙන්ම, අධිකරණ ප්‍රතිසංස්කරණයේ අවසාන අරමුණ වන්නේ ගාසා තීරයේ සීමාවන් දැඩි කිරීම, හරිත රේඛාවෙන් ඔබ්බට සහ එය තුළ පලස්තීනුවන්ට සමාන අයිතිවාසිකම් අහිමි කිරීම, තවත් ඉඩම් එකතු කිරීම සහ ඊශ්රායල පාලනය යටතේ ඇති පලස්තීන ජනගහනයක් ඇති සියලුම ප්‍රදේශ වාර්ගිකහරණයකට ලක් කිරීමයි.
මේ සියල්ල දැන් හිතාමතාම යටපත් කරමින් සිටී. මුලුමනින්ම සාවද්‍ය, බොරු ආඛ්‍යානයක් ගොතනු ලබන අතර, ඒ අනුව ඊශ්රායලය පලස්තීනුවන්ගේ නාසි පන්නයේ ප්‍රහාරවල ගොදුරක් වේ. එහෙත් සත්‍යය නම් පලස්තීනුවන් දශක ගනනාවක් තිස්සේ පීඩනයට ලක්ව නැවත නැවතත් බෝම්බ හෙලීමට හා සමූලඝාතන වලට ලක්ව පැවතීම යි. ඊශ්රායල ආන්ඩුව සහ එහි ආධාරකරුවන් ඔවුන්ගේම ජන සංහාරක අපරාධ සාධාරණීකරණය කිරීම සඳහා මෙම සමූලඝාතනය ගසාකෑමට උත්සාහ කරයි.
ඊශ්‍රායල් සංහාරයට යුරෝපයේ හා එක්සත් ජනපදයේ අධිරාජ්‍යවාදී බලවතුන්ගේ පුර්ණ සහයෝගය සහ දිරිගැන්වීම ලැබේ. එක්සත් ජනපද රාජ්‍ය ලේකම් ඇන්ටනි බ්ලින්කන් බ්‍රහස්පතින්දා නෙතන්යාහු හමුවූයේ, ආක්‍රමණය සැලසුම් කරමින් තිබියදී, ඊශ්‍රායලයට ඔහුගේ පූර්ණ සහයෝගය ප්‍රකාශ කිරීමට ය. ඊශ්‍රායලයට තරණය කළ හැකි “රතු ඉරි” තිබේදැයි NBC ප්‍රවෘත්ති සමඟ සම්මුඛ සාකච්ඡාවකදී ඇසූ විට, බ්ලින්කන් ප්‍රතිචාර දැක්වූයේ ඔහු “කිසිදු මෙහෙයුම් විස්තරයකට නොපැමිණෙන බවත්, නැවතත්, අපි ඒවාට සහාය දැක්වීමට අධිෂ්ඨාන කරගෙන සිටින බවත්ය.”
වෙනත් වචන වලින් කිවහොත්, ඊශ්‍රායලයට තමන් කරන ඕනෑම දෙයක් සඳහා හිස් චෙක්පතක් ඇත. ජෙරුසලමේදී නෙතන්යාහු සමග ඒකාබද්ධ මාධ්‍ය හමුවකදී බ්ලින්කන් මෙසේ ප්‍රකාශ කළේය: “මම ඔබ ඉදිරියට එන්නේ එක්සත් ජනපද රාජ්‍ය ලේකම් ලෙස පමණක් නොව, යුදෙව්වෙකු ද ලෙසය.” බ්ලින්කන් විසින් එක්සත් ජනපද ආන්ඩුවේ නියෝජිතයෙකු ලෙස ඔහුගේ නිල භූමිකාව සමඟ ඔහුගේ පුද්ගලික ආගම පැහැදිලිව සම්බන්ධ කිරීම, ආණ්ඩුක්‍රම ව්‍යවස්ථාව අනුව පල්ලිය සහ රාජ්‍යය වෙන් කිරීම පිලිබඳ ඔහුගේ නොසැලකිල්ල සහ නොදැනුවත්කම හෙලිදරව් කරයි. ඔහුගේ ප්‍රකාශය යුදෙව් විරෝධී ප්‍රචාරණය සඳහා ඉන්ධන සපයයි, මන්ද එය නෙතන්යාහු පාලන තන්ත්‍රයේ අපරාධ සමඟ සියලු යුදෙව්වන් ව්‍යාජ ලෙස සම්බන්ධ කරයි.
ඔහු අවංකව කතා කරන්නේ නම්, “මම ඊශ්‍රායලයට එන්නේ එක්සත් ජනපද රාජ්‍ය ලේකම් ලෙස පමණක් නොව, ගාසා තීරය විනාශ කිරීමේ සහ පලස්තීනුවන් සමූල ඝාතනය කිරීමේ හවුල්කරුවෙකු ලෙස” යැයි බ්ලින්කන් පැවසිය යුතුව තිබුණි.
පලස්තීන නැගිටීම “පූර්ණ නොකිලිටි නපුරේ” ප්‍රකාශනය ලෙස හෙලා දකිමින් කල අගහරුවාදා එක්සත් ජනපද ජනාධිපති ජෝ බයිඩන්ගේ කතාවෙන් පසුව , බ්ලින්කන්ගේ සංචාරය සිදු විය. මෙම බ්‍රහස්පතින්දා බ්‍රසල්ස්හි නේටෝ ආරක්ෂක අමාත්‍යවරුන්ගේ සමුළුවට සමගාමීව කතා කරමින්, එක්සත් ජනපදය විසින් ඊශ්‍රායලයට සපයන ආයුධ භාවිතා කරන ආකාරය සම්බන්ධයෙන් “කොන්දේසියක්” නොපවතින බව එක්සත් ජනපද ආරක්ෂක ලේකම් ලොයිඩ් ඔස්ටින් විසින් තහවුරු කළේය.
අධිරාජ්‍යවාදී බලවතුන් තව තවත් විවෘතව ලෝකයට එරෙහිව යුද්ධයක් දියත් කරන විට, ධනේශ්වර ප්‍රජාතන්ත්‍රවාදයේ අවශේෂයන් පවා නොතකා හරිනු ලබයි. පලස්තීනුවන්ට සහය දැක්වීමේ විරෝධතා මේ සතියේ යුරෝපය සහ උතුරු ඇමරිකාව පුරා තහනම් කරන ලද අතර, ඊට සහභාගිවන්නන් “ත්‍රස්තවාදයේ” ආධාරකරුවන් ලෙස බලධාරීන් විසින් යක්ෂාවේෂ ගන්වා හදුන්වා දෙන ලදී.
විශ්ව විද්‍යාල මණ්ඩපවල දක්ෂිණාංශික සියොන්වාදීන් භීෂණයේ සහ තර්ජනවල වාතාවරණයක් ඇති කිරීමට උත්සාහ කරයි. ඊශ්රායල අපරාධවලට එරෙහිව කතා කළ ශිෂ්‍ය කණ්ඩායම් සහ පුද්ගලයන්ගේ නම් සහ පෞද්ගලික තොරතුරු හෙලිදරව් කර ප්‍රසිද්ධ කර ඇත. ඊයේ බෘක්ලින් විද්‍යාලයේ පැවති රැලියකදී නිව් යෝර්ක් නගර සභාවේ සාමාජිකයෙකු වන, ඉනා වර්නිකොව් සිසුන් බිය ගැන්වීම සඳහා ගිනි අවියක් මානමින් සිටියේය.
ඊශ්රායල අපරාධවලට විරුද්ධවාදීන් යුදෙව් විරෝධී යැයි චෝදනා කරන අයට අපි කියන්නේ ඊශ්රායල රජය ෆැසිස්ට්වාදීන් රැළකින් සමන්විත බවයි. දක්ෂිනාංශික පදිංචිකරුවන් සන්නද්ධ කිරීම සඳහා ප්‍රහාරක රයිෆල් 10,000ක් මිලදී ගන්නා ලෙස තම අමාත්‍යාංශයට නියෝග කළ ජාතික ආරක්ෂක අමාත්‍ය ඉටමාර් බෙන්-ග්වීර් මෙයට ඇතුළත් වේ. බෙන්-ග්වීර් මීට පෙර “අරාබියන්ට මරණය” යැයි කෑමොර දීම සහ ත්‍රස්තවාදී කණ්ඩායමකට සහාය වීම නිසා ජාතිවාදී උසිගැන්වීම් සම්බන්ධයෙන් වරදකරු කරනු ලැබීනි.
එක්සත් ජනපදය හා යුරෝපීය බලවතුන් සම්බන්ධයෙන් ගත් කල, ඔවුන් යුක්රේනයේ ෆැසිස්ට්වාදීන් සමග පෙලගැසී සිටින අතර, සියලුම G7 රටවල නියෝජිතයන් සමග පසුගිය මාසයේ කැනේඩියානු පාර්ලිමේන්තුව විසින් යුක්රේන වෆන්-SS හි හිටපු මිලිටරි සෙබලෙක් වන යරොස්ලාව් හුන්කා පිලිගැනීමට නැගිට අත්පොලසන් දීම ඊට නිදසුන් වේ. ඔහු , නාසි ජර්මනියේ මඟ පෙන්වීම යටතේ යුදෙව්වන් සමූලඝාතනය කිරීම සම්බන්ධයෙන් වගකිව යුත්තෙකි.
ගාසා තීරයට ඊශ්රායල ප්‍රහාරය දැකිය යුත්තේ, ලෝක යුද්ධයේ ආරම්භක අදියර වන රුසියාවට එරෙහි එක්සත් ජනපද-නේටෝ යුද්ධය උත්සන්න වන සන්දර්භය තුළ ය. ලෝකයේ අධිරාජ්‍යවාදී යලි බෙදීම, හුදෙක් රටවල් අතර ගැටුම්වල ස්වරූපය පමණක් නොව, මහජනතාවට එරෙහිව වෙන කවරදාටත් වඩා සෘජු හා ප්‍රචණ්ඩකාරී ලෙස පතිත කරන යුද්ධයක ස්වරූපය ගනී. එපමනක් නොව, ආර්ථික, සමාජීය හා දේශපාලන අර්බුද මාලාවකට මුහුන දී සිටින සියලුම ධනේශ්වර රටවල පාලක ප්‍රභූන්, මිලිටරි ප්‍රචණ්ඩත්වයේ පිපිරීමක් හරහා ඒවා හරවා යැවීමට උත්සාහ කරයි.
මාධ්‍ය මහජන මතය ඉදිරිපත් කරන බව පාලක පන්තිය විශ්වාස කරන නමුත් පලස්තීනුවන්ට සහය ලොව පුරා ජනගහනය අතර පුලුල්ව පැතිරී ඇති අතර සෑම රටකම කම්කරුවන්ගේ වැඩ වර්ජන සහ විරෝධතා ඉහල යමින් පවතී. ඊශ්රායලය තුල නෙතන්යාහු පාලන තන්ත්රය, ප්රජාතන්ත්රවාදී අයිතීන් උදුරා ගැනීමට සහ අත්තනෝමතික තන්ත‍්‍රයක් පිහිටුවීම සදහා කෙරෙන ධාවනයට එරෙහිව කම්කරු පන්තියේ තිරසාර විරෝධයට පසුගිය වසර පුරා මුහුන දී ඇත.
ඊශ්‍රායලයට අවි සැපයීම වහා නතර කරන ලෙස ඉල්ලා කම්කරු පන්තිය මෙම සමූල ඝාතනය නැවැත්වීමට මැදිහත් විය යුතුය. එමෙන්ම මෙම මිනීමරු ප්‍රහාරය අවසන් කරන ලෙස ඉල්ලා සෑම නගරයකම සහ විද්‍යාල පරිශ්‍රයකම මහජන විරෝධතා සහ පෙළපාලි සංවිධානය කළ යුතුය.
පලස්තීනු ජනයා මුහුන දෙන ඉවසිය නොහැකි තත්වයන් සහ ලොව පුරා සියලු ආකාරයේ පීඩනයන් අවසන් කිරීමේ ඉල්ලීම් සමාජවාදය සඳහා ජාත්‍යන්තර කම්කරු පන්තියේ මහජන ව්‍යාපාරයක් වර්ධනය කිරීමේ වඩා පුලුල් අරගලයෙන් වෙන් කල නොහැක.
එ.ජ, යුරෝපීය බලවතුන් ඊශ්රායල සමූහ ඝාතනයට මුලුමනින්ම සම්බන්ධ වෙයි Read More »
