සමාජවාදී සමානතා පක්ෂය
(එක්සත් රාජධානිය), Parti de l’égalité socialiste (ප්‍රංශය), Sozialistische Gleichheitspartei (ජර්මනිය), Sosyalist Eşitlik Grubu (තුර්කිය)
මෙහි පලවන්නේ ලෝක සමාජවාදී වෙබ් අඩවියේ 2023 පෙබරවාරි 10 දින ඉංග්‍රීසියෙන් ප්‍රකාශයට පත් කෙරුනු The mass strike movement, war and the revolutionary crisis in Europe යන ලිපියේ සිංහල පරිවර්ථනය යි. පරිවර්ථනය SF විසිනි.
මහාද්වීපයේ සෑම කොනකින්ම මිලියන ගනනින් කම්කරුවන් කැදවා ගනිමින් මහා වැඩ වර්ජන ව්‍යාපාරයක් යුරෝපය තුල පිපිරී ඇත. දිග හැරෙමින් පවතින්නේ එක් හෝ වෙනත් ධනේශ්වර ආන්ඩුවක් සමග හුදකලා සාකච්ඡා මගින් විසඳා ගත හැකි ජාතික වෘත්තීය සමිති අරගල මාලාවක් නොවේ. ඒ වෙනුවට, කම්කරුවන් සෑම රටකම සමාන ඉල්ලීම් මතු කරමින්, අපකීර්තියට හා පුලුල් ලෙස පිලිකුලට පාත්‍ර වී ඇති ආන්ඩුවල පොලිස් මර්දනයන් හා නීතිමය තර්ජනවලට මුහුණ දෙන බැවින්, එය ජාත්‍යන්තර දේශපාලන අරගලයකි.
මහජනතාවගේ වැඩෙන ඉල්ලීම්වලට කිසිදු සහනයක් ලබා දිය නොහැකි බව ඔවුන් ප්‍රකාශ කරන අතරම, කොන්සර්වැටිව්, සමාජ-ප්‍රජාතන්ත්‍රවාදී හෝ හරිත ආදී සියලු වර්ණයන්ගෙන් යුත් යුරෝපා ආන්ඩු, යුක්‍රේනයේ රුසියාව සමග නැටෝව ගෙන යන යුද්ධය අවදානම් ලෙස තීව්‍ර කරති. ඔවුන් යුරෝ සහ පවුම් බිලියන සිය ගනනක් සිය හමුදා සඳහා වියදම් කරමින් යුක්රේන තන්ත්රය යුද ටැංකි, ජෙට් ප‍්‍රහාරක යානා, මිසයිල සහ වෙනත් ආයුධවලින් හිස සිට දෙපතුල දක්වා සන්නද්ධ කරති. සෑම රටකම කම්කරු පන්තියට එහි පිරිවැය දැරිමට සිදුවන තුන්වන ලෝක යුද්ධයක පිපිරීම ඔවුන් විසින් ක්‍රියාවට නැංවෙමින් පවතී.
තුර්කි-සිරියානු දේශසීමාවේ භූමිකම්පා ව්‍යසනයට ඔවුන් දක්වන ප්‍රතිචාරයෙන් ඔවුන්ගේ සාපරාධී ස්වභාවය තියුනු ලෙස හෙලිදරව් වේ. මිලියන ගනනක් නිවාස අහිමි කර දස දහස් ගනනක් මිය ගිය මෙම සමාජ ව්‍යසනය මධ්‍යයේ, යුරෝපීය බලයන්, වොෂින්ටනය සමග එක්ව, පාලන තන්ත්රය වෙනස් කිරීම සඳහා නේටෝවේ 12 වසරක යුද්ධයෙන් දැනටමත් විනාශ වී ඇති රටක් වන සිරියාවේ කොඳු නාරටිය බිඳ දැමෙන ආකාරයේ සම්බාධක දිගටම පවත්වා ගෙන ගොස් ඇත.
යුරෝපය පුරා මතුවෙමින් පවතින්නේ වෛෂයිකව විප්ලවවාදී වූ තත්වයකි. තෝරා ගැනීම් ශතවර්ෂයකට පෙර පළමු ලෝක සංග්‍රාමය පුපුරා යාමේදී ඒවා ඉදිරිපත් වූ එකී කර්කශ ආකාරයෙන් ම ඉදිරිපත්ව ඇත. එක්කෝ ධනේශ්වර පන්තිය යුරෝපය හා ලෝකය න්‍යෂ්ටිකව සන්නද්ධ රාජ්‍යයන් අතර ගෝලීය යුද්ධයකට ඇද දමනු ඇත, නැතහොත් කම්කරු පන්තිය යුධකාමී පාලක ප්‍රභූව අතින් බලය උදුරා ගනු ඇත.
පලමු ලෝක සංග්‍රාමයේදී කම්කරු පන්තිය යුද්ධයට එරෙහිව සිය පළමු මහා දේශපාලන ප්‍රතිප්‍රහාරය එල්ල කරන තුරු වසර තුනකට ආසන්න කාලයක් ගත විය: 1917 රුසියාවේ පෙබරවාරි විප්ලවය සාර්ව පෙරලා දමා, 1917 ඔක්තෝබර් විප්ලවයේදී ව්ලැඩිමීර් ලෙනින් සහ ලියොන් ට්‍රොට්ස්කි යටතේ බොල්ෂෙවික් පක්ෂය නායකත්වය දුන් කම්කරු පන්තිය බලයට පැමිණීමට මාවත පාදා දුන්නේය. එසේ වෙතත්, අද, ධනේශ්වරය මානව වර්ගයා තුන්වන ලෝක යුද්ධයට ඇද දැමීමට තවමත් උත්සාහ දරමින් හිඳිද්දී ම, කම්කරු පන්තිය බලවත් අරගල රැල්ලක් දියත් කරයි.
මිලියන ගනනක් අරගලයට කැඳවා ගැනෙන මනෝභාවයන් ආරම්භක අවස්ථාවේ දී ම ධනේශ්වර විරෝධී, මිලිටරි විරෝධී සහ සමාජවාදී ස්වභාවයක් ගනී. යුරෝ සහ පවුම් ට්‍රිලියන ගනනක් සුපිරි ධනවතුන්ට ලබා දුන් දශක ගනනාවක රාජ්‍ය ඇප සම්පාදනයන්ගෙන් පසු, විශ්රාම වැටුප් සහ ප්රධාන සමාජ සේවා ඇට මිදුළු දක්වා සූරා ඉවත් කරන කප්පාදු පිලිවෙත් හෝ, ගෝලීය උද්ධමනයේ ඉහල යාමක් මධ්‍යයේ මූර්ත වැටුප් සිඳ ලන කොන්ත්‍රාත් ගිවිසුම් කම්කරුවෝ කෝපයෙන් ප්රතික්ෂේප කරති. රුසියාව සමග පූර්න යුද්ධයක් සදහා දැවැන්ත සමාජ ධන සම්පත් හරවා යැවීම සඳහා තමන් දරිද්‍රතාවය වැලැඳ ගත යුතුයැයි ඔවුන් පිළිගන්නේ නැත.
විශ්රාම යන වයස ඉහල දැමීම මගින් විශ්රාම වැටුප් වලින් යුරෝ බිලියන දස ගනනක් කපා හැරීමේ මැක්‍රොන්ගේ සැලැස්මට එරෙහිව ප්‍රන්සයේ කම්කරුවන් මිලියන තුනක් වැඩවර්ජනයක් ආරම්භ කර ඇත. මැක්‍රොන් මිලිටරි වියදම් සියයට 40කින් වැඩි කිරීමෙන් ද, රුසියාව සමග යුද්ධය සඳහා යුක්‍රේනයට යුද ටැංකි යැවීම ප්‍රකාශ කිරීමෙන් ද පසුව සහ වර්ජකයන්ට පහර දීම සඳහා කැරලි මර්දන පොලිසිය දස දහස් ගනනක් මුදා හැරීමෙන් පසුව මෙම විරුද්ධත්වය වර්ධනය විය. මත විමසුම්වලින් පෙන්නුම් කරන්නේ මැක්‍රොන්ගේ විශ්රාම වැටුප් කප්පාදුවලට සියයට 70ක විරෝධයක් සහ ආර්ථිකය වසා දැමීමේ සහ කප්පාදුව නැවැත්වීමේ සමාජ පිපිරීමකට – එනම්, හරියටම කිවහොත් මැක්‍රොන්ට එරෙහි මහා වැඩ වර්ජනයකට – සියයට 60ක සහයෝගයකි.
බ්‍රිතාන්‍යයේ දුම්රිය, තැපැල්, ටෙලිකොම් කම්කරුවන්, හෙදියන්, පරිපූරක වෛද්‍ය සේවා ශිල්පීන්, පාසල් ගුරුවරුන්, කථිකාචාර්යවරුන් සහ සිවිල් සේවකයන් දැන් මාස හතක් පවතින සහ මිලියන ගනනක් ආවරණය වන වැඩ වර්ජන රැල්ලකට සම්බන්ධ වී සිටිති. වෘත්තීය සමිති නිලධරය විසින් වැඩ වර්ජන නතර කිරීමට දැරෙන නිරන්තර උත්සාහයන් සහ ප්රධාන කර්මාන්ත හා සේවාවල වැඩ වර්ජන සාපරාධී කිරීමේ ආන්ඩුවේ සැලසුම් නොතකා වැඩ වර්ජන දිගටම පවතී.
පසුගිය වසර තුල ඉහල යන ජීවන වියදමට එරෙහිව හදිසි වර්ජන 100 කට අධික සංඛ්‍යාවක් සහ සෞඛ්‍ය සේවා සේවකයින්ගේ මහා වැඩ වර්ජන ඇති වූ තුර්කියේ, වැඩකරන ජනතාව අතර සමාජ කෝපය විප්ලවවාදී පිපිරීමක් කරා ගමන් කරමින් පවතී. මිලියන 13 ක ජනතාවක් වෙසෙන නගර 10 ක දැනටමත් 20,000 කට අධික මරණ සංඛ්‍යාවක් සිදුකර ඇති භූමිකම්පාව, දිගු කලක් තිස්සේ පුරෝකථනය කර තිබූ නමුත් කිසිදු පියවරක් නොගැනීමත්, විපතට පත් වූවන් බොහෝ දුරට ඔවුන්ගේ ඉරණමට අතහැර දමා තිබීමත් රට පුරා පවතින මහජන කෝපයට වැඩි දුරටත් ඉන්ධන සපයයි.
ජර්මනියේ, යුරෝපයට රුසියානු බලශක්ති අපනයන කප්පාදුව මගින් උග්‍ර වී ඇති, මූර්ත (සැබෑ) වැටුප් මත උද්ධමනයේ විනාශකාරී බලපෑමට එරෙහිව වැඩ වර්ජන වැඩෙමින් තිබේ. මිලියන දෙකහමාරක් ගුරුවරුන්, තැපැල් සේවකයින්, රෝහල් සහ සනීපාරක්ෂක කම්කරුවන්, ප්‍රවාහන කම්කරුවන් සහ අනෙකුත් රාජ්‍ය සේවකයන් ප්රධාන වැටුප් කප්පාදු හා සම්බන්ධ කොන්ත්‍රාත්තු සාකච්ඡා මධ්‍යයේ “අනතුරු ඇඟවීමේ වැඩ වර්ජන” වල යෙදී සිටිති. රුසියාව සමග යුද්ධය සඳහා ජර්මනිය මුලුමනින්ම යලි මිලිටරිකරණය කිරීමේ දේශපාලන සංස්ථාපිතයේ සැලැස්මට අතිමහත් මහජන විරෝධයක් පවතී.
“කාර්මික ක්‍රියාමාර්ගයන් යුරෝපයේ ආර්ථිකයන් ග්‍රහණය කරමින් සිටින” නිසා “වියවුල් සහගත තත්වයට” එරෙහිව එක්සත් රාජධානියේ දක්ෂිණාංශික ඩේලි මේල් පුවත්පතේ ගර්හාන්විත කෑ මොර ගෑම අතරතුර මෙම රටාව යුරෝපය පුරා පුනරාවර්තනය වේ. ඉතාලියේ, ගුවන් සේවා සහ ගුවන් තොටුපල සේවකයින්, දුම්රිය සේවකයින්, අධ්‍යාපනඥයින් සහ ප්‍රාදේශීය ප්‍රවාහන සේවකයින් මේ මාසයේ කාර්මික ක්‍රියාමාර්ග ගනිමින් සිටිති. ස්පාඤ්ඤයේ ගුවන් ගමනාගමන පාලකයින්, ගුවන් සේවා සේවකයින්, සෞඛ්‍ය සේවකයින්, ඇමේසන් කාර්ය මණ්ඩලය සහ ගුරුවරු වැඩවර්ජනයේ යෙදී සිටිති. පෘතුගාලයේ, දුම්රිය සේවකයන්, වෛද්‍යවරුන් සහ අධ්‍යාපනඥයන්ගේ වෘත්තීය ක්‍රියාමාර්ග ඇතුළුව, වැඩ වර්ජන දස වසරක පැවැති ඉහලම මට්ටමට සේන්දු වී පවතී.
කොවිඩ්-19 ව්‍යාප්තිය මැඩලීමේ කිසිදු විද්‍යාත්මක ප්‍රතිපත්තියක් අනුගමනය කිරීම යුරෝපීය රජයන් විසින් ප්රතික්ෂේප කරනු ලැබීම නිසා ඇති වූ රෝගාබාධ හා මරණවලට ප්‍රමුඛවම ගොදුරු වූ රටක් රටක් පාසා සෞඛ්‍ය, අධ්‍යාපන සහ ප්‍රවාහන සේවකයින් විසින් ගනු ලැබ ඇති වෘත්තීය ක්‍රියාමාර්ග විශේෂයෙන් වැදගත් වේ.
මහජනතාවගේ නැගී එන ඉල්ලීම් හේතුවෙන් පාලක පන්තිය තුල මතු වී ඇති සංත්‍රාසය සහ භීතිය, රුසියාව සමග යුද්ධය උත්සන්න කිරීම පිටුපස ඇති ප්රධාන ගාමක බලවේගයකි. මුලුමනින්ම හිස අවුල් කර ගෙන ඇති එය, යුද්ධය උත්සන්න කිරීම පන්ති අරගලයේ වර්ධනය තාවකාලිකව හෝ යටපත් කිරීමට ඉඩ සලසනු ඇතැයි යන මංමුලා සහගත සහ අවධානම් සහිත සූදුවේ යෙදී සිටී.
ඒ වෙනුවට, යුද්ධයට එරෙහි විරෝධය, සමාජ හා දේශපාලන විරෝධතාවල සහ ධනපතියන් හා කම්කරුවන් අතර විවෘත දේශපාලන ගැටුමක තීරනාත්මක සාධකයක් බවට පත්වෙමින් තිබේ. මිලිටරි වියදම් වැඩි කිරීම සඳහා අරමුදල් සැපයීම වෙනුවෙන් රජයේ නිවාඩු දිනයක් අහෝසි කිරීමේ සැලසුම් වලට එරෙහිව ඩෙන්මාර්කයේ අගනුවර වන කෝපන්හේගන්හි ඇස්තමේන්තුගත 50,000 ක ජනතාවක් මෙම මාසයේ පෙළපාලි ගියහ. යලි යලිත්, යුරෝපය පුරා වර්ජකයින් මැසිවිලි නගන්නේ, වැටුප් සඳහා ද, මහජන සෞඛ්‍ය හා විශ්රාම වැටුප් වැනි සමාජ සේවා සඳහා ද මුදල් නොමැති නමුත් යුද අයවැයේ වැඩිකිරීම් වල අවසානයක් නොමැති බවයි.
පළමුවන ලෝක යුද්ධයේ පළමු වසරේ දී, එවකට ස්විට්සර්ලන්තයේ හුදකලා දේශපාලන පිටුවහලෙක් වූ බොල්ෂෙවික් නායක ව්ලැඩිමීර් ලෙනින් අවධාරනය කලේ, ලෝක යුද්ධය පුපුරා යාම ලෝක සමාජවාදී විප්ලවය සඳහා වෛෂයික කොන්දේසි ද නිර්මානය කල බවයි. ඔහු, ලෝක යුද්ධයට සහාය දුන්නා වූ ද, විප්ලවය කළ නොහැකි බවට ප්රතික්ෂේප කළා වූ ද යුරෝපීය සමාජ-ප්‍රජාතන්ත්‍රවාදීන්ට අශමනීය ලෙස විරුද්ධ විය. ලෙනින් පෙන්වා දුන්නේ විප්ලවවාදී තත්වයක් පහත දැක්වෙන ප්රධාන ලක්ෂණ තුන මගින් සංලක්ෂිත ටන බවයි: (1) පාලක පන්තීන්ට කිසිදු වෙනසක් නොකොට තම පාලනය පවත්වාගෙන යාමට නොහැකි වීම …; (2) පීඩිත පංතිවල දුක් වේදනා සහ අවශ්‍යතා වෙනදාට වඩා උග්‍ර වී පැවතීම; (3) ඉහත හේතූන්ගේ ප්‍රතිවිපාකයක් ලෙස මහජනයාගේ ක්‍රියාකාරිත්වයේ සැලකිය යුතු වැඩි වීමක්…. ස්වාධීන ඓතිහාසික ක්‍රියාමාර්ග කරා පිවිසීමක් ඇති වීම.
ශතවර්ෂයකට පසුව, ලෙනින්ගේ විශ්ලේෂනය යුරෝපයේ සිදුවෙමින් පවතින අර්බුදයේ වෛෂයික විප්ලවවාදී ස්වභාවය කෙරේ ආලෝකය විහිදුවයි. ස්ටැලින්වාදී නිලධරයන් විසින් නැගෙනහිර යුරෝපයේ ධනවාදය පුනස්ථාපනය කිරීමෙන් සහ 1991 දී සෝවියට් සංගමය විසුරුවා හැරීමෙන් පසු කාලපරිච්ඡේදයේ දී සිදු කල පරිද්දෙන්, යුරෝපීය ධනේශ්වරයට තවදුරටත් පැරණි ආකාරයෙන් පාලනය කළ නොහැක.
1991 සිට, එය – ඉරාකය, යුගෝස්ලාවියාව, ඇෆ්ගනිස්ථානය, ලිබියාව, සිරියාව, මාලි සහ ඉන් ඔබ්බෙහි වූ – විදේශයන්හි නේටෝ යුද්ධ දියත් කර ඇති අතර ස්වදේශය තුළ නිර්දය ලෙස කප්පාදු ක්‍රියාවට නංවා ඇත. දෙවන ලෝක සංග්‍රාමයේදී නාසි ජර්මනිය සෝවියට් දේශය අතින් පරාජය වීමෙන් පසු කාලපරිච්ඡේදය තුළ එය අනුගමනය කළ ප්‍රතිසංස්කරණවාදී වේශය මුලුමනින්ම ප්රතික්ෂේප කර ඇති එය, අද විවෘතව ෆැසිස්ට් පක්ෂ සහ පොලිස්-රාජ්‍ය ආකාරයේ පාලන ආකෘති ප්‍රවර්ධනය කරයි. එය වූ කලී, විකෘතරූපී පරපෝෂී මූල්‍ය රදල පැලැන්තියකි. ඔවුන්ගේ ධනය රඳා පවතින්නේ විදේශයන්හි නිර්දය මිලිටරි ක්‍රියා තීව්‍ර කිරීම සහ රට තුළ, සමාජ කප්පාදුව හා බැංකු ඇපදීම් සඳහා මහජන මුදල් ලබා දීම මගින් මෙහෙයවනු ලබන සමපේක්ෂන කොටස් වෙලඳපොලේ වියරුව මත ය.
කොවිඩ්-19 වසංගතය ලෝක ඉතිහාසයේ ප්‍රේරක සිදුවීමක් වූ අතර, දශක ගණනාවක් තිස්සේ වර්ධනය වෙමින් තිබූ පන්ති ගැටුම් එමඟින් ගුණාත්මකව නව තීව්‍රතා මස්තකයකට ගෙන එන ලදී. බැංකු ඇපදීමේ නව වටයකින් පාලක ප්‍රභූවේ කඩදාසි ධනය විශාල ලෙස පුම්බනු ලැබූ නමුත්, එය මහා පරිමාන මරණ හා දුක් වේදනා විඳීම් කෙරෙහි තම නිර්දය නොසැලකිල්ල හේතුවෙන් අපකීර්තියට පත් විය. රුසියාව සමග මරාගෙන මැරෙන යුද්ධයක් අවුලුවාලමින් සහ ස්වදේශීය විරෝධතා මැඩීමේ මිලිටරි-පොලිස් මර්දනය වේගවත් කරමින් දකුනට ගත් තියුනු හැරීමකින් එය ප්‍රතිචාර දක්වා ඇත.
වසංගතය, කම්කරු පන්තිය සඳහා දුක් විඳීමේ සහ අගහිගකමේ දැඩි තීව්‍රවීමක් ඇඟවුම් කළේය. දැවැන්ත නව බැංකු ඇපදීම් සදහා හදිසි මුදල් එන්නත් කිරීම උද්ධමනකාරී සර්පිලයකට ක්‍රියාරම්භය සැපයූ අතරතුර, යුරෝපයේ මිලියන දෙකක ජනතාවක් කෝවිඩ්-19 නිසා මිය ගියෝය. ජාතික වෘත්තීය සමිති නිලධරයන් සහ පාලක පන්තීන් අතර අනුග්‍රහය, සේවා කොන්ත්‍රාත් සහ “සමාජ සංවාදය”ට එරෙහිව, කම්කරු පන්තිය යුරෝපය පුරා දියත් කර ඇති ජාත්‍යන්තර අරගල රැල්ල, ස්වාධීන ඓතිහාසික ක්‍රියාමාර්ගයක් කරා එහි ප්‍රවිෂ්ඨයෙන් සමන්විත වෙයි.
පුපුරන සුලු සමාජ කෝපය, පන්ති අරගලයේ මතු වෙමින් පවතින ගෝලීය පිපිරීමක වැඩි දියුනු ප්‍රකාශනයක් වන, මහාද්වීපය අලලා ගත් කම්කරු පන්තියේ වැඩ වර්ජන ව්‍යාපාරයට ඉන්ධන සපයයි. තීරනාත්මක ප්‍රශ්නය වන්නේ, හාම්පුතුන්ට හෝ ජාතික ආන්ඩුවලට එරෙහි තම අරගල, ධනවාදයට එරෙහි කම්කරු පන්තියේ වෛෂයිකව එක්සත්, ජාත්‍යන්තර ප්‍රහාරයක කොටසක් බවට වන විඥානය කම්කරු පන්තිය තුල වර්ධනය කිරීමයි.
අද දින, ගෝලීය වශයෙන් ඒකාබද්ධ වූ මහා ජන සමාජයේ ධනය නිර්මානය කරන වැඩකරන ජනතාවට, මෙම ධනය භාවිතා කරන්නේ කෙසේද යන්න තීරණය කිරීමට අයිතියක් ඇති අතර, අත්‍යවශ්‍ය සමාජ අවශ්‍යතා සපුරාලීම සඳහා ද, නිරන්තරව වර්ධනය කෙරෙන යූද්ධය නතර කිරීම සඳහා ද ආර්ථිකය මත මූල්‍ය ප්‍රභූ පැලැන්තියේ ආඥාව කඩා බිඳ දැමිය යුතුය. කම්කරු පන්තියේ දියුනු ස්ථරයන් අතර එවන් අවබෝධයක් වර්ධනය වීම, අධිරාජ්‍යවාදී යුද්ධයට එරෙහිව සහ සමාජවාදය සඳහා අරගලය තුල මෙම අරගල ඒකාබද්ධ කිරීමේ පදනම සකසනු ඇත.
යුද්ධය නැවැත්වීම සහ කප්පාදුව අවසන් කිරීම සඳහා කම්කරුවන් වෘත්තීය සමිති නිලධරයෙන් ස්වාධීනව, රැකියා ස්ථානවල සහ පාසල්වල බලගතු, ජාත්‍යන්තර අරගලයේ සංවිධාන ගොඩනැගීම අවශ්‍ය වේ. පැන නගින සෑම වැඩවර්ජනයක්ම තහවුරු කරන්නේ වෘත්තීය සමිති නිලධරය කම්කරුවන්, හාම්පුතුන් හා ධනේශ්වර රාජ්‍යය සමග ඔවුන් කරන ගනුදෙනුවලට යටත් කිරීමටත්, ඒ ඒ රටවල ධනේශ්වර පන්තියේ යුද පිලිවෙත ආරක්ෂා කිරීමටත් වැඩ කරන බව ය. බැංකුවල කප්පාදු ඉල්ලීම් වලට එරෙහිව සහ රුසියාවට එරෙහි නැටෝ යුද්ධයට එරෙහිව කම්කරු පන්තියට ජාත්‍යන්තරව එක්සත් විය හැක්කේ අරගලයේ නව සංවිධාන මගින් පමනි.
ලෝක ට්‍රොට්ස්කිවාදී ව්‍යාපාරය වන හතරවන ජාත්‍යන්තරයේ ජාත්‍යන්තර කමිටුව (හජාජාක) කප්පාදුවට හා යුද්ධයට එරෙහි අරගලයේ අත්‍යවශ්‍ය සංරචකයක් ලෙස කම්කරු ක්‍රියාකාරී කමිටු වල ජාත්‍යන්තර කම්කරු සන්ධානය (IWA-RFC) ගොඩනැගීමට ඉල්ලා සිටිමින් ඒ සදහා අතර සටන් කරයි. පන්ති අරගලය යුරෝපය පුරා මහා වැඩවර්ජන පුපුරා යාම දෙසට විකාශනය වන විට මෙම මුලපිරීමේ කාලෝචිත බව වෙන කවරදාටත් වඩා පැහැදිලි වේ.
කම්කරු පන්තියේ ව්‍යාපාරය මුහුන දෙන දැවැන්ත දේශපාලන කර්තව්‍යයන් ජාත්‍යන්තර කමිටුව එහි ජාත්‍යන්තර දේශපාලන නායකත්වය ලෙස ගොඩ නැගීම දවසේ න්‍යාය පත්‍රයට ඇතුලත් කර ඇත.
විශාලතම මහා වැඩවර්ජනය පවා ධනවාදය තුන්වන ලෝක යුද්ධයකට ඇද වැටීම හා එහි නිර්දය සමාජ ප්‍රහාර හා කම්කරු පන්තිය මර්දනය කිරීම නවත්වන්නේ නැත. දේශපාලන සංස්ථාපිතයේ සියලු බලවේග අධිෂ්ඨානශීලී සතුරන් ලෙස තමන්ට මුහුන දෙන බවට පැහැදිලි අවබෝධයකින් කම්කරු පන්තිය සන්නද්ධ විය යුතුය. තව තවත් වාමාංශික ධනේශ්වර ආන්ඩු තෝරා පත් කර ගැනීමට උත්සාහ කිරීමෙන් අර්බුදය විසඳිය නොහැකි අතර, එසේ කල හැක්කේ යුරෝපය පුරා හා ජාත්‍යන්තරව කම්කරුවන්ගේ බලය සහ සමාජවාදය ස්ථාපිත කිරීම සඳහා කම්කරු පන්තිය විසින් සිය අරගලය තුල ගොඩනගාගත් සංවිධාන වෙත බලය පැවරීම සඳහා අරගලයෙන් පමනි.
ඔවුන් සිටින්නේ ආණ්ඩුව තුල හෝ විපක්ෂයේ හෝ වේවා, ජර්මනියේ සමාජ ප්‍රජාතන්ත්‍රවාදීන් සහ බ්‍රිතාන්‍යයේ කම්කරු පක්ෂය වැනි ඉහත ප්‍රතිසංස්කරනවාදී පක්ෂ ලෙස පැවැති ඒවා කප්පාදුවල හා යුද්ධයේ රුදුරු පක්ෂවාදීහු වෙති. ස්ටැලින්ගේ “තනි රටේ සමාජවාදය” පිලිබඳ ව්‍යාජ න්‍යායයේ ආධාරකරුවන්ගෙන් පැවත එන ව්‍යාජ-වාම දේශපාලන සංවිධානයෝ හෝ ට්‍රොට්ස්කිවාදයෙන් පලා ගිය ද්‍රෝහීහු ද විකල්පයක් නියෝජනය නොකරති.
ජර්මනියේ ඩි ලින්ක, ප්‍රංශයේ නව ධනේශ්වර විරෝධී පක්ෂය (එන්පීඒ) සහ ජාන්-ලුක් මෙලන්ෂොන්, ස්පාඤ්ඤයේ පොඩෙමොස්, සහ සිරිසා (“රැඩිකල් වාම සභාගය”) වැනි බලවේගවල මධ්‍යම පාන්තික සමාජ වටපිටාව ඔවුන් ගේ ක්‍රියා කලාපයේ වාර්තාව මගින් හෙලිදරව් වේ. ග්‍රීසියේ බලය ලබා ගත් සිරිසා, කප්පාදුව අවසන් කිරීමට දුන් පොරොන්දු ප්රතික්ෂේප කර, ඒ වෙනුවට විශ්රාම වැටුප් හා සමාජ වියදම් කපා හැර සරණාගතයින් සඳහා ගාල් කඳවුරු ගොඩ නැගුවේය. අද බලයේ සිටින, පොඩෙමොස් යුක්රේන නව-නාසි අසොව් (Azov) බලඇණිය සන්නද්ධ කරමින්, බැංකුවලට ඇප ලබා දෙමින්, වැඩ වර්ජන කරන ට්‍රක් රථකරුවන්ට සහ ලෝහ කම්කරුවන්ට පහර දීම සඳහා කැරලි මර්දන පොලිසිය මෙහෙයවයි.
බ්‍රිතාන්‍යයේ කම්කරු පක්ෂයේ නායකත්වය කරා ශීඝ්‍රයෙන් නැඟුනු ජෙරමි කෝබින් සහ ඔහුගේ ව්‍යාජ වාම ආධාරකරුවන් පක්ෂයේ දක්ෂිනාංශයට එරෙහිව කිසිදු අරගලයක් කිරීම ප්රතික්ෂේප කොට, වැඩ වර්ජනවල ප‍්‍රකාශිත විරුද්ධවාදියා වන යුධකාමී උන්මත්තක කිය(ර්) ස්ටා(ර්)ම(ර්) වෙත නායකත්වය පවරා දුන්නේය. මෙලන්ෂොන් සහ ඩි ලින්ක වැනි බලවේග මැතිවරනයේදී මිලියන ගනනක් ඡන්ද දිනා ගෙන ඇති නමුත්, යුද්ධයට එරෙහිව මහජන මනෝගතිය බලමුලු ගැන්වීමේ කිසිදු ආයාචනයක් කිරීම ඒවා විසින් තරයේ මග හරිනු ලැබ ඇත.
මෙම දක්ෂිනාංශික, යුද ගැති සමාජ වටපිටාවට විකල්පය වන්නේ, ඔක්තෝබර් විප්ලවයට පාදක වූ මාක්ස්වාදය සහ නොනවතින විප්ලවයේ ඉදිරිදර්ශනය ජාත්‍යන්තර කමිටුව විසින් ආරක්ෂා කරනු ලැබීමයි. එය මූල්‍ය වංශාධිපතිත්වයේ දේපල අත්පත් කර ගැනීමට, ධනවාදය පෙරලා දමා යුරෝපයේ එක්සත් සමාජවාදී සමූහාණ්ඩුව ගොඩනැගීමට, කම්කරු පන්තියේ අරගලයක් සඳහා දේශපාලන හා ඓතිහාසික පදනම සපයයි.
ජාත්‍යන්තර කමිටුව, යුරෝපයේ හා ජාත්‍යන්තරව, කම්කරු පන්තිය තුල මාක්ස්වාදී විප්ලවවාදී විඥානය සඳහා අරගලය තීව්‍ර කිරීම මගින් තීව්‍රවන යුද්ධයට හා විප්ලවවාදී අර්බුදයට ප්‍රතිචාර දක්වනු ඇත. ව්‍යාපාරයේ පරිමාණය සහ එහි වෛෂයික විප්ලවවාදී විභවය ද, සතුරු පන්ති බලවේගවල අවශිෂ්ට බලපෑම ද අතර අගාධයක් පවතී; එය අධිෂ්ඨානශීලී අරගලයක් තුලින් ජයගත යුතුය. කම්කරු පන්තියේ වැඩෙන විප්ලවවාදී ව්‍යාපාරය සමාජවාදය සඳහා වූ සවිඥානක ව්‍යාපාරයක් බවට පරිවර්තනය කිරීමට අපි සටන් කරන්නෙමු. මෙහි අර්ථය වන්නේ සමාජවාදී විප්ලවයේ නව මහජන පක්ෂ ලෙස හජාජාක සහ එහි ශාඛා ගොඩනැගීමයි.
#WSWS #theSocialistLK
Image Courtesy of The Guardian
