ජීන් ෂෝල් විසිනි.
මෙහි පලවන්නේ ලෝක සමාජවාදී වෙබ් අඩවියේ 2023 නොවැම්බර් 06 දින පල වූ “Blinken-Abbas meeting: Palestinian Authority courted as Israel’s policeman in Gaza” යන ජීන් ෂෝල් විසින් ලියන ලද ලිපියේ සිංහල පරිවර්තනය යි. පරිවර්තනය මිගාර මල්වත්ත විසිනි.
ඉරිදා, එක්සත් ජනපද රාජ්‍ය ලේකම් ඇන්ටනි බ්ලින්කන්, නිවේදනයකින් තොරව , පලස්තීන අධිකාරියේ (PA) ජනාධිපති මහමුද් අබ්බාස් හමුවීමට ඊශ්‍රායලය විසින් අල්ලාගෙන සිටින බටහිර ඉවුරේ රමල්ලා හි සංචාරයක නිරත විය.
ඔහුගේ ප්‍රකාශිත අරමුන වූයේ හමාස් සංවිධානය බලයෙන් පහ කළ පසු ගාසා තීරය පවත්වාගෙන යාමේ දී පලස්තීන අධිකාරියට කළ හැකි කාර්යභාරය සාකච්ඡා කිරීමයි. බයිඩන් පරිපාලනයේ සාමාජිකයෙකු සමඟ එවන් රැස්වීමකට අබ්බාස් එකඟ වීම – එවැන්නක් තවමත් අවශ්‍ය නම් – ෆාටා ප්‍රමුඛ පරිපාලනය ඊශ්‍රායලයට සහ එහි අධිරාජ්‍යවාදී ආධාරකරුවන්ට පොලිස් බලකායක් ලෙස ක්‍රියා කරන බවට සාක්ෂියකි.
ගාසා තීරය මත , නෙතන්යාහුගේ මිනීමරු කාපට් බෝම්බ හෙලීමට සහ සමූහ මිනීමැරුම් සහ ගාසා තීරය ජනවාර්ගික පවිත්‍ර කිරීම ඉලක්ක කරගත් දිග හැරෙන භූමි ආක්‍රමණයකට බිඩෙන් පරිපාලනය සිය පූර්ණ පිටුබලය ලබා දී ඇත. 350,000 දක්වා වූ හමුදා සංචිතවල සහාය ඇතිව, ලෝකයේ වඩාත්ම ජනාකීර්ණ ප්‍රදේශවලින් එකකට එරෙහිව ඊශ්‍රායලයේ ප්‍රහාරයේ දරුණුකම, දරුවන් 4,000ක්, කාන්තාවන් 2,500ක් සහ වයෝවෘද්ධ පුද්ගලයන් 500ක් ඇතුළුව, 10,000කට වඩා ජීවිත දැනටමත් බිලිගෙන තිබීමෙන් පෙන්නුම් කරයි. එනම් සමස්ත මරණ සංඛ්‍යාවෙන් අවම වශයෙන් සියයට 70 ක් සිවිල් වැසියන් බවයි.
තවත් 25,000කට වැඩි පිරිසක් තුවාල ලබා ඇත. ඊශ්‍රායලය වටලනු ලැබූ ප්‍රදේශයට ඉන්ධන, ආහාර, විදුලිය සහ පානීය ජලය පවා නතර කර ඇති අතර එමඟින් තවත් දහස් ගණනක් මිය යනු ඇත. එහි හමුදාව ගාසා තීරය දෙකට බෙදා , සන්නිවේදන විසන්ධි කර, ගාසාවේ වැසියන්ගෙන් හතරෙන් එකකගේ නිවෙස්වලට බෝම්බ හෙළා, ඔවුන්ගේ නිවාස, පලස්තීනුවන් රැකවරණය පතා සිටි එක්සත් ජාතීන්ගේ මධ්‍යස්ථාන සහ රෝහල්, පාසල් සහ පල්ලි ආදී සියල්ල ඔවුන්ට අහිමි කර ඇත,
මේ සියලු මරණය හා විනාශය සිදු කර ඇත්තේ එක්සත් ජනපද අධිරාජ්‍යවාදය විසින් සැපයූ සහ ගෙවන ලද නවීන අවි ආයුධ මගිනි. ඒ අතරම, ඊශ්‍රායල පදිංචිකරුවන් සහ හමුදාව ඔක්තෝබර් 7 දා සිට අවම වශයෙන් පලස්තීනුවන් 150 දෙනෙකුවත් මරා දමා බටහිර ඉවුරේ පලස්තීනුවන්ට එරෙහි ඔවුන්ගේ ප්‍රහාර තීව්‍ර කර ඇත.2023 පළමු මාස නවය තුළ අවම වශයෙන් පලස්තීනුවන් 200 ක් මරා දමා ඇත. පසුගිය වසරේ මුල සිට තීව්‍ර වන හමුදා ප්‍රහාර සහ සන්නද්ධ පදිංචිකරුවන්ගේ ප්‍රහාරයන් මත මෙය සිදු වේ.
නෙතන්යාහු සහ ඔහුගේ ලේ පිපාසිත ෆැසිස්ට්වාදීන්ගේ කල්ලිය ගාසා තීරයේ වැඩි කොටසක් සුන්බුන් බවට පත් කිරීමෙන් පසු, මේ කිසිවක්, පලස්තීන අධිකාරිය විසින් ගාසා තීරයේ කුමන භූමිකාවක් ඉටු කළ හැකිද යන්න සාකච්ඡා කිරීම සඳහා බ්ලින්කන් හමුවීමට , මුලුමනින්ම නිර්ලජ්ජිත අබ්බාස් වළක්වන්නේ නැත. ඒ වෙනුවට ඔහු සටන් විරාමයකට පිටුබලය දෙන ලෙස එක්සත් ජනපදයෙන් ඉල්ලා සිටියේ, ඊශ්‍රායලය ලවා “සිවිල් හානිය අවම කිරීම” සඳහා වොෂින්ටනයේ දරන උත්සාහයන් පිළිබඳව, යුද අපරාධකරු බ්ලින්කන් කල විසුළු සහගත ප්‍රකාශය අතරේ දීය.
නෙතන්යාහු පාලනයට ඔවුන්ගේ ජන ඝාතනයෙන් පසු ඉතිරි ව , එහි ජීවත්වන පලස්තීනුවන් ඇතුලත් කරගන්නා කිසිදු සැලසුමක් ගාසාව පිලිබදව නොමැති බව බයිඩන් පරිපාලනය හොඳින් දනී. 2006 සිට ගාසා තීරය පාලනය කරන මුස්ලිම් සහෝදරත්වයට අනුබද්ධ කන්ඩායම වන “හමාස්ගේ අවසාන අංශු මාත්‍ර සියල්ල මුලිනුපුටා දැමීම” යන්නෙන් අදහස් කරන්නේ “හමාස් සංවිධානය උපක්‍රමශීලීව හිස ගසා දැමීම පමණක් නොව, ගාසා තීරයේ , ඊට ඇති ඕනෑම මිලිටරි හෝ අධිකරණ බලයක් ලබා ගැනීමේ හැකියාව තලා දැමීම බව” ඊශ්‍රායල බලධාරීන් ප්‍රකාශ කර ඇත.
ඊශ්‍රායල ආරක්ෂක හමුදාව (IDF) දැනටමත් සෘජු මිලිටරි පාලනයක් සඳහා අඩිතාලම සකස් කරමින් සිටින අතර ඊශ්‍රායලය ගාසා තීරයේ පූර්ණ පාලනය සියතට ගැනීමට අදහස් කරයි. අන්ත දක්ෂිණාංශික නීති සම්පාදකයින් අවම වශයෙන් ගාසා තීරයේ කොටසක් අත්පත් කර ගෙන එහි ජනාවාස නැවත ස්ථාපිත කිරීමේ හැකියාව මතු කර ඇත.
මේ වන විට, ජ්‍යෙෂ්ඨ නිලධාරීන් ගාසා තීරය අත්පත් කර ගැනීම ප්‍රසිද්ධියේ ප්‍රතික්ෂේප කර ඇත-එක්සත් ජනපද ජනාධිපති ජෝ බිඩෙන් නෙතන්යාහුට අනතුරු අඟවා ඇත්තේ ගාසා තීරය නැවත අත්පත් කර ගැනීම “විශාල වැරැද්දක්” වනු ඇති බවයි.නමුත් අභ්‍යන්තර ලේඛන කාන්දු වීමෙන් පසුව, ඒවා ප්‍රකාශයට පත් කර ඇති අතර, විකල්පයක් ලෙස සමස්ත ජනගහනයම ඊජිප්තුවේ සීනායි කාන්තාරයට හෝ ඊශ්‍රායලයේ නෙගෙව් වෙත මාරු කිරීමේ සැලසුම් සකස් කර ඇත. බ්ලින්කන් සහ අබ්බාස් මුණගැසෙන විට පවා, යුදෙව් බලය නම් සංවිධානයේ සාමාජිකයෙකු වන ඊශ්‍රායලයේ උරුමය පිළිබඳව ඇමති අමිචයි එලියාහු, ගාසා තීරයේ න්‍යෂ්ටික බෝම්බයක් භාවිතා කිරීම , හමාස් තර්ජනය සමඟ කටයුතු කිරීමේ එක් ක්‍රමයක් විය හැකි බව යෝජනා කළේය. “ගාසා තීරයේ අහිංසකයන් කියා දෙයක් නැත,” ඔවුන් සියල්ලෝම “කාන්තාරයට හෝ අයර්ලන්තයට” යා යුතු යැයි ඔහු පැවසීය. ඉන් අපහසුතාවයට පත් නෙතන්යාහු, ඔහුව කැබිනට් මණ්ඩලයෙන් අත්හිටුවීමේ සංකේතාත්මක ක්‍රියාමාර්ගය ගත්තේය.
ඊශ්‍රායලයේ සැලසුම්වල සැබෑ යථාර්ථය වසන් කිරීමට උත්සාහ කිරීම සඳහා, එක්සත් ජනපදය ජාත්‍යන්තර බලවේගයක්-සමහරවිට අරාබි රාජ්‍යයන්ගෙන් සහ එක්සත් ජනපදය, යුරෝපා සංගමය සහ එක්සත් ජාතීන්ගේ සහාය ලැබෙන– වගකීම භාර ගැනීමේ හැකියාව මතු කර ඇති අතර, ඊශ්‍රායලය විසින් තත්‍ය ලෙස ගාසා තීරය අල්ලා ගැනීම සඳහා පලස්තීන ආවරණයක් සැපයීමට අබ්බාස් දැන් හඬ නගමින් සිටී. මෙය විශාල වශයෙන් ඉරානය ඉලක්ක කර ගනිමින් පුලුල් යුද්ධයකට පිටුබලය පතා බ්ලින්කන් මැද පෙරදිග සංචාරය කරන අතර තුර, ඊශ්‍රායලය ගාසා තීරයට සම්පූර්ණයෙන්ම විනාශ කරන විට දූෂිත අරාබි පාලන තන්ත්‍රයන්ට සහ තුර්කියට කිසිවක් නොකර සිටීමට , දේවල් පහසු කරවීමේ උත්සාහයක් විය.
ඊශ්‍රායල-පලස්තීන ගැටුමට “පුළුල් දේශපාලන විසඳුමක්” නොමැතිව ගාසාවේ භූමිකාවකට පලස්තින අධිකාරිය එකඟ නොවන බව අබ්බාස්ගේ ප්‍රකාශකයා රංගනයක් ලෙස බ්ලින්කන්ට ප්‍රකාශ කරන ලද අතර , ෆාටා සිතන්නේ මෙය ඔවුන්ගෙන් ඉටු කිරීමට ඉල්ලා සිටින සාපරාධී භූමිකාව සඳහා යම් ආවරණයක් සපයන බවයි, නමුත් මෙය මුළාවකි. පලස්තීන විරෝධය මැඩලීමේ එහි භූමිකාව නොතකා , ඊශ්‍රායලය දැනටමත් පලස්තින අධිකාරිය ඉවසන්නේ යන්තම් ය. එය යලි යලිත් එහි බදු ආදායම අත්හිටුවා ඇත, ජනාවාස ව්‍යාප්ත කිරීම වේගවත් කර ඇති අතර, පලස්තීනුවන් ඔවුන්ගේ භූමියෙන් පලවා හැරීමේ අරමුණින් සන්නද්ධ පදිංචිකරුවන් විසින් පලස්තීනුවන්ට එරෙහිව එල්ල කරන ප්‍රහාරවලට, එය සහාය දක්වයි.
ගාසා තීරයේ වාර්ගික සුද්ධ කිරීම මෙන්ම , බටහිර ඉවුරේ ද එවැනිම මෙහෙයුමක් කිරීමට වැඩි කාලයක් ගත නොවනු ඇත. ආගමික සියොන්වාදයේ ප්‍රධානියා වන අන්ත දක්ෂිනාංශික මුදල් ඇමති බැසිලල් ස්මෝට්‍රිච් සහ යුදෙව් බලයට නායකත්වය දෙන ජාතික ආරක්ෂක ඇමති ඉටමාර් බෙන්-ග්විර් , බටහිර ඉවුර ඈඳා ගැනීමේ ඔවුන්ගේ සැලසුම්වල කොටසක් ලෙස පලස්තින අධිකාරියෙහි බිඳවැටීම ගෙන ඒමට හැකි සෑම දෙයක්ම කර ඇත. සියොන්වාදී පදිංචිකරුවන්, 700,000 දැනටමත් එක්සත් ජනපදය විසින් සපයනු ලබන ප්‍රහාරක රයිෆල් වලින් සන්නද්ධව සිටින අතර, IDF හි ආරක්ෂාව යටතේ පලස්තීනුවන්ට එරෙහි ඔවුන්ගේ ත්‍රස්ත ප්‍රහාර වේගවත් කරයි.
පලස්තීනුවන් කෙරෙහි ඊශ්‍රායල ආධිපත්‍යය තහවුරු කිරීමට සේවය කළ ඔස්ලෝ ගිවිසුමේ සාකච්ඡාකරුවෙකු ලෙස, අබ්බාස් දූෂිත හා අකාර්යක්ෂම පරිපාලනයක මුලසුන හොබවන ඊශ්‍රායලයේ ගෝලයා ලෙස සැලකේ. 2006 මැතිවරනයේදී හමාස් හි ජයග්‍රහණයට තුඩු දුන්නේ පලස්තීන විමුක්ති සංවිධානයේ (PLO) ඔහුගේ ෆාටා කන්ඩායමට ඇති පුලුල්ව පැතිරුනු සතුරුකමයි.
ඊශ්‍රායලයේ පිටුබලය ඇතිව, අබ්බාස් එහි ගාසා බලකොටුව තුළ හමාස් සංවිධානයට එරෙහිව අවසානයේ අසාර්ථක සිවිල් යුද්ධයක් දියත් කළ අතර, ඔහුගේ පරාජයෙන් පසුව, ඔහු ගාසා තීරය අවහිර කිරීම, හුදකලා කිරීම සහ කුසගින්නෙන් පෙළීම සඳහා ඊශ්‍රායලය සමඟ සහයෝගයෙන් කටයුතු කළේය. දහස් ගණනකගේ ජීවිත අහිමි කිරීමට තුඩු දුන් 2008-09, 2012, 2014, 2018, 2021 සහ 2023 දී ඊශ්‍රායලයේ මිනීමරු ප්‍රහාරවලට එරෙහිව ගාසාවේ පුරවැසියන් ආරක්ෂා කිරීමට පලස්තින අධිකාරිය කිසිවක් කළේ නැත. ෆාටා හි ජනප්‍රියත්වය කෙතරම් දුරට ඛාදනය වූයේද යත්, 2006 න් පසු කිසිදු මැතිවරණයක් පැවැත්වීම අබ්බාස් විසින් ප්‍රතික්ෂේප කරන ලදී.
එය ගල් යුගයට ආපසු තල්ලු කරමින් බෝම්බ හෙලීමෙන් පසු ගාසාවේ ම්ලේච්ඡ ඊශ්‍රායල ආඥාදායකත්වයක් සඳහා මුහුණත වෙමින් පලස්තීන අධිකාරිය සඳහා භූමිකාවක් අබ්බාස් භාර ගන්නේ නම්, මෙම පාවාදීමේ වාර්තාවේ වැදගත් කම බොහෝසෙයින් හීන වනු ඇත.
බටහිර ඉවුරේ දරිද්‍රතාවයෙන් පෙළෙන බන්ටුස්තානයන් [වර්ණභේදවාදී රාජ්‍යයක ඇති ඊනියා ස්වයං පාලන ප්‍රදේශ] වල සහ ගාසා තීරයේ එළිමහන් සිර කඳවුරකට සීමා වූ , වාඩිලාගෙන සිටින ප්‍රදේශ තුළ ස්වාධීන පලස්තීන රාජ්‍යයක් ගොඩනැගීමේ ජාතිකවාදී ව්‍යාපෘතිය ,පලස්තීනුවන් පීඩාවට පත් කිරීමේ මාධ්‍යයක් ලෙස, කෙතරම් දුරට ඔප්පු වී ඇත්ද යන්න රමල්ලාහි සාකච්ඡා පෙන්නුම් කරයි. හමාස්ගේ නැගීම අනාගමික ධනේශ්වර ජාතිකවාදී PLO සමග මහජන කලකිරීමේ ප්‍රතිඵලයක් වී ඇත. නමුත් ඉස්ලාමීය ව්‍යාපාරය ශක්‍ය විකල්පයක් ඉදිරිපත් නොකරයි.
අධිරාජ්‍යවාදය විසින් මැදිහත්ව ගොඩනගන ලද ජාතික රාජ්‍යයක් ගබ්සා කිරීමකින් පලස්තීන ජනතාවගේ විමුක්තිය කිසිදා සාක්ෂාත් කරගත නොහැක. ජාතික හා ආගමික සීමාවන් ඉක්මවා යමින් , අධිරාජ්‍යවාදයට සහ ඊශ්‍රායල හා අරාබි යන දෙඅංශයෙහිම, එහි දේශීය නියෝජිතයින්ට එරෙහි පොදු අරගලයක්, එක්සත් කල හැක්කේ කම්කරු පන්තියට පමනි.සියලුම පුරවැසියන්ට සමානාත්මතාවය සහිත බහුජාතික රාජ්‍යයක් සහ මැද පෙරදිග එක්සත් සමාජවාදී රාජ්‍යයක් සඳහා වන අරගලයේදී , පීඩාවට, දරිද්‍රතාවයට, වාර්ගික පවිත්‍ර කිරීමට සහ යුද්ධයට තිත තැබිය හැක .
ජාත්‍යන්තරව පන්ති අරගලයේ වර්ධනය අධිරාජ්‍යවාදී ආධිපත්‍යයට තිත තැබීමේ පදනම සපයයි. ගාසා තීරයේ යුද්ධයට එරෙහි අරගලය අසමානතාවයට හා සූරාකෑමට එරෙහිව කම්කරුවන්ගේ ලෝක ව්‍යාප්ත අරගලයට සම්බන්ධ කර ජාත්‍යන්තර සමාජවාදය සඳහා සවිඥානික දේශපාලන ව්‍යාපාරයක් ලෙස වර්ධනය කල යුතුය.
