අපේ වාර්තාකරු
ගාසා තීරයේ පලස්තීනු පීඩිත ජනතාවට එරෙහිව බෙන්ජමින් නෙතන්යාහු ප්‍රමුඛ සියොන්වාදී ඊශ්‍රායල පාලක පන්තිය වොෂින්ටනය ප්‍රමුඛ අධිරාජ්‍යවාදී කඳවුරු වල පූර්න සහාය සහිතව ගෙනයන සමූල ඝාතක යුද්ධය වහා නවතන ලෙස බලකරමින් කොලඹ ක්‍රියාකාරී කමිටුව (කොක්‍රික) ඊයේ (26) සවස කොලඹ කොටුව දුම්රිය ස්ථානය ඉදිරිපිටදී සාර්ථක පිකට් උද්ඝෝෂනයක නිරත විය.
උද්ඝෝෂනයට දිවයිනේ විවිධ ප්‍රදේශවලින් තරුන, වැඩිමහල් දෙනා සහභාගී වී සිටියහ. උද්ඝෝෂකයෝ ලොව පුරා දැවැන්ත කම්කරු පන්තියකට පැහැදිලි ඉදිරිදර්ශනයක්, නායකත්වයක් හා දේශපාලන වැඩපිලිවෙලක් සම්පාදනය කරන සටන්පාඨ රැගත් විරෝධතා පුවරු ප්‍රදර්ශනය කරමින් උදඝෝෂනයට සහභාගී විය. උද්ඝෝෂනයට පෙර දින කිහිපයක්ම කමිටුවේ සහෝදරවරු “සියොන්වාදයට එරෙහිව පලස්තීනු මහජනයා ආරක්ෂා කරනු!” යන කමිටුවේ ප්‍රකාශයේ අත්පත්‍රිකා දෙදහසකට ආසන්න ප්‍රමානයක් බෙදා හරිමින් මහජනතාව අතර උද්ඝෝෂනයේ නිරත වූහ.
එකී ප්‍රකාශයේ මෙසේ සඳහන් වෙයි:
“අද මුලු මහත් අධිරාජ්‍යවාදී පද්ධතිය ම, ගැඹුරින්ම දෙදරුම් කන ආර්ථික දේශපාලන අර්බුදයකින් වෙලී තුන්වැනි ලෝක යුද්ධයක සැලසුම් වෙත යොමු වෙමින් පවතී. ඊශ්‍රායලය තුල දැන් වර්ධනය වන්නේ මෙතෙක් පැවති ප්‍රතිඝතිකතාවල නව අදියරක් වන්නේ එබැවිනි. කම්කරු පන්තියට නිදහස අවශ්‍ය වන අතර, අධිරාජ්‍යවාදී ධනවාදයට එය මුලුමනින් වලලා දැමීමත් අවශ්‍යය ය. පලස්තීන ජනතාවගේ නිදහස සදහා අරගලය ඊශ්‍රායලය ඇතුලු සෑම රටකම කම්කරු පන්තිය විසින් ආරක්ෂා කිරීම මග නො හැරිය හැකි පන්ති අවශ්‍යතාවක් වන්නේ එබැවිනි.
හතරවන ජාත්‍යන්තරයේ ජාත්‍යන්තර කමිටුව හා ලෝක සමාජවාදී වෙබ් අඩවිය ඒ සඳහා අවශ්‍ය කම්කරු පන්තික ජාත්‍යන්තරවාදී ඉදිරිදර්ශනය හා ක්‍රියා මාර්ගය වර්ධනය කරමින් අරගලයට ප්‍රවිශ්ට වී ඇත. පලස්තීන ජනතාවගේ අරගලය ආරක්ෂා කිරීම සඳහා එය විසින් කරනු ලැබ ඇති යෝජනා සමග සිටගන්නා කොලඹ ක්‍රියාකාරී කමිටුව, එම අරගලය වටා රොක් වන ලෙස සියලු ප්‍රගතිශීලී ජනයාගෙන් ඉල්ලා සිටියි.”
සිංහල, දෙමල හා ඉංග්‍රීසි යන භාෂා තුනෙන්ම විරෝධතා පුවරු ප්‍රදර්ශනය කෙරිනි.
ගාසා තීරය නිදහස් කරනු!; පලස්තීනයට එරෙහි අධිරාජ්‍යවාදී; සියොන්වාදී සමූල ඝාතන නතර කරනු!; ද්විත්ව රාජ්‍ය උගුල එපා!; කම්කරුවනි, ඊශ්‍රායලයට යුද අවි ප්‍රවාහනය වර්ජනය කරනු!; ගාසා පීඩිතයන්ට එරෙහි බෙහෙත්, වතුර, ආහාර තහංචි බිදිනු!; මධ්‍යධරනී මුහුදෙන් ඇමරිකානු ප්‍රහාරක නෞකා ඉවත් කරනු!; ජන විලෝපනයට සහාය දෙන ශ්‍රී ලකා ආන්ඩුව හෙලා දකිනු!; පලස්තීන, ඊශ්‍රායල් කම්කරු පන්තියේ ඒකාබද්ධ සමාජවාදී පාලනයක්!, ඒ සටන් පාඪ අතර විය.
පැය තුන් කාලකට වැඩි කාලයක් උද්ඝෝෂනයේ නිරත වූ උද්ඝෝෂකයෝ පහත සටන් පාඨ හඬ නගා කීවෝය:
පලස්තීන පීඩිතයන්ට එරෙහි ඊශ්‍රායල් ප්‍රහාරය – නතර කරව්
පලස්තීන ප්‍රදේශ වට්ලෑම- අවසන් කරව්
ඊශ්‍රායල් හමුදා- නිරායුධ කරව්
වතුර බෙහෙත් අහර- ගාසවට ලබා දියව්
කිරි දරුවන්- බිලි ගනිමින්
කිරි මව්වරු- බිම හෙලමින්
කන බොන දේ – නැති කරලා
රොහල් ටික- ගිනි තියලා
අධිරද ගැති- සියොන්වදි
මෙන්න මිනී- මරනවා
ලොකෙ පුරා- ධනපතියන්
යුද්ධ ලාභ- ගනිනවා
ලේ රස -තලු මරනවා
ඊශ්‍රායලෙ- පලස්තීනෙ
කම්කරුවෙනි- එකතු වන්න
ඇමරිකාවෙ -යුරෝපයේ
කම්කරුවනි- පෙල ගැසෙන්න
ආසියාවෙ – මුලු ලෝකයෙ
පීඩිතයිනි- නැගී එන්න
යුද්ධ කරන- ලභ ගරන
ධනවාදය- වල දමන්න
උද්ඝෝෂනය අවසානයේ කොක්‍රික සභාපති සංජය ජයසේකර සහෝදරයා උද්ඝෝෂකයන් හා පැමින සිටි මාධ්‍යවේදීන් ගනනාවක්ම අමතමින් කතා කලේ ය.
ගාසාහි වැඩිමනත් කාන්තාවන් හා දරුවන් ඇතුලු පීඩිත පලස්තීන මහජනතාව සාගින්නට හා විජලනයට ලක්කරමින් නාසි අපරාධ හා සසැඳිය හැකි මහා ජනඝාතනයක් නෙතනය්හු තන්ත්‍රය විසින් ගෙනයන බවත් ඔහුත් එම තන්ත්‍රයට උපකාර කරන අධිරාජ්‍යවාදී නායකයිනුත් යුධ අපරාධකරුවන් බවත් ඔහු ප්‍රකාශ කලේ ය. 1947 බ්‍රිතාන්‍ය අධිරාජ්‍යවාදය ප්‍රමුඛව එක්සත් ජාතීන් ගේ සංවිධානය යටතේ පලස්තීනය බෙදා ඊශ්‍රායලය නිර්මානය කිරීමත් සමග පලස්තීනුවන්ට එරෙහිව 1948 ඇරඹි ජන සංහාරක “නක්බාව” අවසන් නොවූ බවත් පසුගිය වසර 75 පුරාවටම දිනපතා පලස්තීනුවන්ට එරෙහිව එය ක්‍රියාත්මක වුනු බවත් ඔහු කියා සිටියේ ය. ඔක්තෝමබර් 7 හමාස් ප්‍රහාරය මෙලෙස අනවරතව හිංසනයට ලක් කෙරුනු පලස්තීනු පීඩිතයන්ගේ කැරැල්ලක් බව ඔහු පැහැදිලි කලේ ය.
පලස්තීනු පීඩත මහජනතාවගේ නිදහසේ අරගලය ද ඊශ්‍රායල කම්කරු පන්තියේ ප්‍රජාතන්ත්‍රවාදී අයිතීන් ද තහවරු කෙරෙනු ඇත්තේ අධිරාජ්‍යවාදී ද්වි-රාජ්‍ය මර උගුල මත නොව යුදෙව්-අරාබි ඒකාබද්ධ සමාජවාදී රාජ්‍යයක් තුල පමනක් බව ජයසේකර අවධාරනය කලේ ය. පලස්තීනු පීඩිත ජනයා ආරක්ෂා කරමින් යුද්ධය වැලැක්වීම සඳහා පලස්තීනු කම්කරු මහජනතාව සමග එක පෙලට සිටගන්නා ලෙස විශේෂයෙන් ඊශ්‍රායලයේද, ලංකාවේ ද, ලොව පුරා කම්කරු පන්තිය රැලි වෙන ලෙස ඔහු ඉල්ලා සිටියේ ය.
අනතුරුව කමිටුවේ ලේකම් මාධ්‍යවේදී ශාන්ත විජේසූරිය කතා කරමින් පලස්තීනු ජනඝාතනය නැවැත්වීමේ යුධ විරෝධී ව්‍යාපාරයට කම්කරු පන්තිය ඒකාබද්ධ විය යුතු බවත්, කොක්‍රික ගොඩනගන ලෙසත් වැඩකරන ජනතාවටගන් ඉල්ලා සිටියේ ය.
කොක්‍රික විධායක කමිටු සාමාජික නන්දන නන්නෙත්ති කතා කරමින් පැහැදිලි කලේ පලස්තීනයේ මහජනතාවගෙන් 81% ක් දුප්පතුන් බවත්, 63%ක් ආහාර හිඟයෙන් පෙලෙන බවත්, විරැකියාව 41%ක් බවත් සමස්ත ජන ජීවිතය පර පීඩක ඊශ්‍රායල ආන්ඩුව විසින් පාලනය කරන බැවින්, බලෙන් වාඩිලාගෙන සිටින පලස්තීන ප්‍රදේශ ඊශ්‍රායල සිර කඳවුරක් බවත්ය. ලොව ධනපතියන් විශාල ප්‍රමානයක් වෙසෙන ඊශ්‍රායලය තුල අසමානතාවය කොතෙක් ද යත් එහි ජනතාවගෙන් 50%ක වත්කමට වඩා 19 ගුනයක වැඩි ප්‍රමානයක් එහි ධනපතියන් සතු බවත්, ඒ නිසා ඊශ්‍රායල් කම්කරු පන්තියේ ජ්‍රජාතන්ත්‍රවාදී අයිතීන් රැකීම යුද්ධයට එරෙහි වීම සමග අවශ්‍යයෙන්ම බැඳී තිබෙන බවත් ය. හමාස් ඇතුලු කිසිදු ජාතිකවාදී සංවිධානයකට පීඩිත ජාතීන්ගේ අයිතීන් ආරක්ෂා කිරීමේ මොනම හැකියාවක්වත් අධිරාජ්‍යවාදී පද්ධතිය තුල නැත. යුද්ධයට එරෙහි අරගලය තම රටේ දේශීය ධනපති පාලක පන්තියට එරෙහිව කරන සටනකින් වියුක්ත කිරීම ප්‍රෝඩාකාරී වැඩපිලිවෙලක් බවද නන්නෙත්ති අවධාරනය කලේය.
පිකට් උද්ඝෝෂනයෙන් පසු ක්‍රික සාමාජිකයන් සමග සාකච්ජාවේ නිරත වූ සහෝදරවරු කිහිප දෙනෙක්ම රටේ සෙසු ප්‍රදේශවල ද මෙවන් උද්ඝෝෂන සංවිධානය කිරීමට යෝජනා කල අතර කොක්‍රික ඒවාට සහභාගී කරන ලෙසත් ඉල්ලා සිටියෝය. ස්වාධීන කම්කරු ක්‍රියාකාරී කමිටු පිහිටුවා ගනිමින් ඒවා දේශීයවත්, ජාත්‍යන්තරවත් ඒකාබද්ධ කිරීමෙන් පමනක් මෙම යුද විරෝධී හා ප්‍රජාතන්ත්‍ර අයිතීන් සඳහා වූ මහජන ව්‍යාපාරය ගොඩනැගිය හැකි බව පැහැදිලි කල ක්‍රික සාමාජිකයෝ ඔවුනට එම ප්‍රාදේශීය කමිටු පිහිටුවීම සඳහා මූලිකත්වය ගන්නා ලෙස ආරාධනා කලහ.
