ඇලෙක්ස් ලැන්ටියර් විසිනි.
මෙහි පලවන්නේ ලෝක සමාජවාදී වෙබ් අඩවියේ 2023 ඔක්තෝබර් 18 දින පල වූ ‘500 dead as Israel bombs Al Ahli Arab hospital in Gaza‘ යන ඇලෙක්ස් ලැන්ටියර් විසින් ලියන ලද ඉදිරිදර්ශන ලිපියේ සිංහල පරිවර්තනය යි. පරිවර්තනය කිත්රුවන් මොලදන්ඩ විසිනි.
අඟහරුවාදා ගාසා නගරයේ අල් අහ්ලි අරාබි රෝහලට ඊශ්‍රායල ආරක්ෂක හමුදා (IDF) බෝම්බ හෙලීමෙන් පන්සියයක් මිය ගිය අතර තවත් බොහෝ දෙනෙක් තුවාල ලැබූහ. එක්සත් ජනපද ජනාධිපති ජෝ බයිඩන් සහ අනෙකුත් නේටෝ අධිරාජ්‍යවාදී බලවතුන්ගේ නායකයින් ගාසා තීරයේ පලස්තීනුවන්ට එරෙහි ඊශ්‍රායලයේ ජන සංහාරක ප්‍රහාරයට ඔවුන්ගේ පූර්ණ සහයෝගය යලි තහවුරු කිරීමත් සමඟ සිදු කරන ලද මෙම යුද අපරාධයට එරෙහිව ජාත්‍යන්තරව විරෝධතා පුපුරා ගියේය.
රෝහලට බෝම්බ හෙලීම සිදු වූයේ, එළිමහන් සිරකඳවුරක් ලෙස පුලුල්ව විස්තර කෙරෙන, ජනාකීර්ණ සහ දිළිඳු වාසස්ථානය ඊශ්‍රායලය විසින් අවහිර කිරීම, සියලු ජලය, ඉන්ධන සහ ආහාර සැපයුම් කපා හැර ඇති කොන්දේසි යටතේ ය. මිලියන 1.1ක් පමණ පලස්තීනුවන් ගාසා නගරයෙන් සහ උතුරු ගාසා තීරයෙන් පලා ගොස් දකුණට ගමන් කරන ලෙස ඉල්ලා සිටිමින් IDF ඉවත් කිරීමේ නියෝගයක් අනුගමනය කළේය.
රෝහලට බෝම්බ හෙලීමට ටික වේලාවකට පෙර, ඊශ්‍රායල හමුදා අසල පිහිටි අල්-මගාසි සරණාගත කඳවුරේ එක්සත් ජාතීන්ගේ පාසලකට බෝම්බ ප්‍රහාරයක් එල්ල කිරීමෙන් , හය දෙනෙක් මිය ගිය අතර තවත් දුසිම් ගනනක් තුවාල ලැබූහ. එක්සත් ජාතීන්ගේ සහන සහ වැඩ ඒජන්සියේ (UNRWA) නිලධාරි තමරා අල්-රිෆායි පැවසුවේ පාසලට “සෘජු ඊශ්‍රායල වෙඩි තැබීමක්” වූ බවයි. ඇය මෙම ප්‍රහාරය “අතිශයින්ම කම්පන සහගත” ලෙස හැඳින්වූවාය, “අපි අපගේ සියලු ගොඩනැගිලි පැහැදිලිව හඳුනාගෙන ඇති අතර, අප [යුද්ධයේ සටන් කරන] සියලුම පාර්ශ්ව සමඟ GPS ඛණ්ඩාංක බෙදා ගෙන ඇත. එම කඳවුර අවතැන් වූ පුද්ගලයන් 4,000කට සත්කාරකත්වය සැපයීය.”
පාසලට බෝම්බ හෙලීමෙන් පසුව, අල් අහ්ලි අරාබි රෝහලේ දැවැන්ත පිපිරීමක් සිදු වූ අතර, ඊශ්‍රායලයේ ගුවන් ප්‍රහාර වලින් තුවාල ලැබූ සිය ගනනක් සහ මිනීමරු ප්‍රහාරවලින් රැකවරණය පතා සාපේක්ෂ වශයෙන් ආරක්ෂිත ස්ථානයක් වනු ඇතැයි විශ්වාස කළ දහස් ගණනක් එහි රැස්වී සිටියහ. එම ස්ථානයේ සිටි සෞඛ්‍ය සේවකයින්ගේ වාර්තාවලට අනුව, රෝහල් බෝම්බ ප්‍රහාරයෙන් මියගිය සිය ගනනක් අතරට එම ස්ථානයෙන් පිටත බිම නිදා සිටි සරණාගතයින් ද ඇතුළත් ය.
( ට්විටර් පණිවිඩය )
වෛද්‍ය ගසාන් අබු සිත්තා මෙසේ පැවසීය: “අපි රෝහලේ සැත්කම් කරමින් සිටියෙමු, ප්‍රබල පිපිරීමක් ඇති වූ අතර සිවිලිම ශල්‍යාගාරය මතට වැටුණි. මෙය සමූල ඝාතනයකි.”
පලස්තීන සෞඛ්‍ය අමාත්‍යාංශයේ නිලධාරීන් මරණ සංඛ්‍යාව 500 ඉක්මවන බව තහවුරු කළ නමුත් තවත් වින්දිතයින් සුන්බුන් යට වැළලී ඇති බව පැවසීය.ගාසා තීරය ඊශ්‍රායල අවහිර කිරීමට එරෙහිව ඔක්තෝම්බර් 6-7 දිනවල ආරම්භ වූ කැරැල්ලේ සිට, ඊශ්‍රායල විසින් ගාසා තීරයට එල්ල කළ බෝම්බ ප්‍රහාරයෙන් සමස්ත මරණ සංඛ්‍යාව,3,000 දක්වා ඉහළ ගොස් ඇති අතර , 12,500 කට වැඩි පිරිසක් තුවාල ලබා ඇති බව ඔවුහු පැවසූහ. මෙම සංඛ්‍යා දැනටමත් 2014 දී ගාසා තීරයේ දින 53 ක ඊශ්‍රායල යුද්ධයේදී වාර්තා වූ සංඛ්‍යාවට වඩා වැඩි ය.
බෝම්බ ප්‍රහාරය ඇසින් දුටු හදිසි ප්‍රථම ප්‍රතිචාරකයෙක් ඇනඩොලු ඒජන්සියට මෙසේ පැවසීය: “ඔවුන් නිදා සිටියේ ගස් යට පමණි, කාමර නැත, නවාතැන් නැත. ඔවුන්ට රොකට් වලින් බෝම්බ හෙලූවා. තුවාලකරුවන් සිටියේ නැත, ඔවුන් සියල්ලෝම මිය ගියහ. අපට දිවි පිදූවන් ගණන් කළ නොහැකි විය, ඔවුන් කැබලිවලට ඉරා දැමීය. … අවම වශයෙන්, ඔවුන්ගෙන් සියයට 30 සිට 40 දක්වා ළමුන් විය.
ඔහු වැඩිදුරටත් කියා සිටියේ “ජන සංහාරය නැවැත්විය යුතුයි. ලෝකයේ නායකයන් වෙනුවෙන්, ඔබ ගාසා තීරයේ මෙම සංහාරය නතර කළ යුතුය.
දේශසීමා රහිත වෛද්‍යවරු (MSF) ජාත්‍යන්තර වෛද්‍ය පුණ්‍යායතනය ට්විටර්/X හි ඊශ්‍රායල බෝම්බ ප්‍රහාරය හෙළා දුටුවේය.
රෝගීන්ට ප්‍රතිකාර කරමින් සහ අවතැන් වූ ගාසා වැසියන්ට සත්කාර කරමින් සිටි ගාසා නගරයේ අහ්ලි අරාබි රෝහලට ඊශ්‍රායලය විසින් මෑතකදී බෝම්බ හෙලීමෙන් අපි භීතියට පත් වෙමු. වාර්තා වන පරිදි මිනිසුන් සිය ගනනක් ඝාතනය කර ඇත … එය කිසිසේත්ම පිළිගත නොහැකිය.
පලස්තීන ඉස්ලාමීය ජිහාඩ් කන්ඩායම විසින් ඊශ්‍රායලය එල්ල කර , දියත් කරන ලද රොකට් ප්‍රහාරයක් වැරදීමකින් රෝහල මත පතිත වීමෙන්, මෙය සිදු වූ බව පවසමින් ඊශ්‍රායල නිලධාරීන් නරුම ලෙස සමූල ඝාතනයේ වගකීම ප්‍රතික්ෂේප කිරීමට උත්සාහ කළහ. රෝහලට “ප්‍රහාර එල්ල කිරීම” සම්බන්ධයෙන් “ගාසාවේ සිටින ම්ලේච්ඡ ත්‍රස්තවාදීන්” වගකිව යුතු බව පැවසූ ඊශ්‍රායල අගමැති නෙතන්යාහු, “අපේ දරුවන් අමානුෂික ලෙස ඝාතනය කළ කවුරුන් හෝ ඔවුන්ගේ දරුවන් ද ඝාතනය කරයි” යනුවෙන් පැවසීය.
එක්සත් ජනපදයේ ඊශ්‍රායල තානාපති මයිකල් හර්සොග් ට්විටර්හි වීඩියෝවක් විකාශනය කරමින් ඇඟවීමට උත්සාහ ගත්තේ,ගාසාවේ සිට දියත් කරන ලද රොකට් නැවත ගාසා භූමියට වැටෙන බවත්.අල් අහ්බි රෝහලේ ප්‍රහාරයත් එවන් සිදුවීමක් විය හැකි බවත් පෙන්වීමටය. වීඩියෝ පටයේ සටහන්ව තිබූ කාලයට අනුව රාත්‍රී 8.00 ට පමණ සිදුවීම වූ බැවින්, එය ප්‍රහාරය සිදු වූ වේලාවට වඩා පැය තුනකට ආසන්න කාලයක් ප්‍රමාද වී ඇති බව හෙළිවීමත් සමගම, මෙම බොරුව බිඳ වැටුණි.
ඉස්ලාමීය ජිහාඩ් සංවිධානය ප්‍රහාරයේ වගකීම ප්‍රතික්ෂේප කරමින් නිවේදනයක් නිකුත් කරමින් මෙසේ ප්‍රකාශ කළේය:
ගාසාවේ බැප්ටිස්ට් අරාබි ජාතික රෝහලට බෝම්බ හෙලීමෙන් ඔහු කළ කුරිරු සංහාරයේ වගකීමෙන් ගැලවීමට සියොන්වාදී සතුරා දැඩි උත්සාහයක නිරත වන්නේ ඔහුගේ සුපුරුදු බොරු ගොතමින් සහ පලස්තීනයේ ඉස්ලාමීය ජිහාඩ් ව්‍යාපාරය වෙත වරදට ඇඟිල්ල දිගු කිරීමෙනි.
නෙතන්යාහු ආන්ඩුව සහ එහි නේටෝ ආධාරකරුවන් මෙම බිහිසුණු සංහාරය සිදු කළහ. එය ගලා එන්නේ වොෂින්ටනය සහ එහි යුරෝපීය අධිරාජ්‍යවාදී සහචරයින් විසින් මුලුමනින්ම සහාය දක්වන IDF සහ නෙතන්යාහු ආන්ඩුවේ සමස්ත ජනඝාතක මූලෝපායෙනි.
ඊශ්‍රායල් ආන්ඩුවේ ජන සංහාරයේ සහ වාර්ගික පවිත්‍ර කිරීමේ මූලෝපායේ කේන්ද්‍රීය කොටස – එය මිලියනයකට අධික ගාසා වැසියන්ට තම නිවෙස් හැර යන ලෙස නියෝග කර ඇති අතර, ඔවුන්ට ජලය, ආහාර සහ ඉන්ධන සඳහා ප්‍රවේශය ප්‍රතික්ෂේප කරයි. වෛද්‍ය ප්‍රතිකාර සඳහා ප්‍රවේශය අවහිර කිරීමයි. ඊශ්‍රායල් සහ නේටෝ නිලධාරීන් ගාසා තීරයේ නීති විරෝධී අවහිර කිරීම ආරක්ෂා කර ඇත. බලශක්තිය කපා හැරීම , ප්‍රතිකාරය ස්ථාවර විදුලි සැපයුමක් මත රඳා පවතින, ඉන්කියුබේටර්වල නොමේරූ ළදරුවන්, ඩයලිසිස් රෝගීන් සහ දැඩි සත්කාර රෝගීන්ගේ විශාල මරණ ප්‍රමාණයකට තුඩු දෙනු ඇත.
ඊයේ, ගාසා තීරයේ රෝහල් 23 න් 20 ක් “අර්ධ සේවා” පමණක් සිදු කරමින් සිටියේ ඒවායේ ඉන්ධන සහ බලශක්ති සංචිත “සම්පූර්ණයෙන්ම පාහේ ක්ෂය වී ඇති” නිසා ය. මෙම සතිය මුලදී, ලෝක සෞඛ්‍ය සංවිධානයේ (WHO) නිලධාරීන් විසින් ගාසා තීරයේ සෞඛ්‍ය මධ්‍යස්ථාන 111කට ප්‍රහාර එල්ල කර, සෞඛ්‍ය සේවකයින් 12ක් මරා දමා, ගිලන්රථ 60කට බෝම්බ ප්‍රහාර එල්ල කර ඇති බව තහවුරු කරන ලදී.
ගාසා තීරයේ ජනතාව ඉලක්ක කර ගනිමින් මනුෂ්‍යත්වයට එරෙහි මෙම නවතම, බිහිසුණු අපරාධයට එරෙහිව අඟහරුවාදා ලොව පුරා විරෝධතා පැන නැගුනි. එක්සත් ජනපදයේ, විරෝධතාකරුවන් නැවත වරක් ධවල මන්දිරයෙන් පිටත රැස් වූ අතර අනෙක් අය නිව් යෝර්ක් නගරයේ සහ ලාස් වේගාස් හි පෙළපාලි ගියහ. බදාදා සහ ඊළඟ දිනවලදී තවත් පෙලපාලි බලාපොරොත්තු වේ.
( ට්විටර් පණිවිඩය)
කැනඩාවේ, මොන්ට්‍රියල් හි එක්සත් ජනපද කොන්සල් කාර්යාලයට පිටතින් , රෝහල් බෝම්බ ප්‍රහාරයට විරෝධය දැක්වීමට පලස්තීනයට පක්ෂපාතී විරෝධතාකරුවෝ දහස් ගණනක් පෙළපාලි ගියහ.
විරෝධතා , මැද පෙරදිග සහ උතුරු අප්‍රිකාව පුරා පැතිර ගියේය. බටහිර ඉවුරේ, පලස්තීන විරෝධතාකරුවෝ, ඊශ්‍රායලයේ සහ එක්සත් ජනපදයේ අතකොළුවක් ලෙස ක්‍රියා කරන පලස්තීන අධිකාරියේ ජනාධිපති මහමුද් අබ්බාස් ගැන සඳහන් කරමින්, “ජනතාවට ජනාධිපතිවරයාගේ වැටීම අවශ්‍යයි” යනුවෙන් කෑගසමින් රමල්ලාහි පෙළපාලි ගියහ. කැරලි මර්දන පොලිසිය කඳුළු ගෑස් ප්‍රහාරයක් එල්ල කිරීමෙන් පෙළපාලිකරුවන් ඉක්මනින් විසුරුවා හරින ලදී.
බටහිර ඉවුරේ නබ්ලස් සහ ජෙනින් නගරවල ද විරෝධතා වාර්තා විය.
විරෝධතාකරුවන් දහස් ගණනක් තුර්කියේ සහ ජෝර්දානයේ අම්මාන්හි ඊශ්‍රායල කොන්සල් කාර්යාලවල පිටත පෙලපාලි දැක්වූහ. අම්මාන්හිදී, එක්සත් ජනපද මධ්‍යස්ථානයේ පරිමිතිය උල්ලංඝනය කිරීමට උත්සාහ කළ විරෝධතාකරුවන් කැරලි මර්දන පොලිසිය සමඟ ගැටී ඇත.
ලෙබනනයේ, විරෝධතාකරුවන් බේරූට්හි එක්සත් ජනපද සහ ප්‍රංශ තානාපති කාර්යාලවලට පිටතින් පෙළපාලි ගිය අතර, සිදොන් සහ ටයර්හි පලස්තීන සරණාගත කඳවුරුවල විරෝධතා පුපුරා ගියේය. උතුරු ඊශ්‍රායලයේ IDF හමුදා සමඟ වඩාත් තීව්‍ර කාලතුවක්කු ප්‍රහාර හුවමාරුවක් කළ ෂියා ඉස්ලාමීය මිලීෂියාව වන හිස්බුල්ලා සටන්කාමීන්, බදාදා දිනය “කෝපයේ දිනයක්” ලෙස විරෝධතාවක් කැඳවා ඇත.
ටියුනිස්හිදී, විරෝධතාකරුවන් ප්‍රංශ තානාපති කාර්යාලයෙන් පිටත පෙළපාලි යාම සඳහා වූ විරෝධතාවලට එරෙහි රාජ්‍ය තහනම කඩ කරමින් : “ප්‍රංශ සහ ඇමරිකානුවන් සියොන්වාදීන්ගේ සහචරයෝ” සහ “ටියුනීසියානු භූමියේ ඇමරිකානු තානාපති කාර්යාලයක් එපා.” කියමින් කෑ ගැසූහ.
ඉරානයේ, විරෝධතාකරුවන් “ප්‍රංශයට, එංගලන්තයට, ඇමරිකාවට සහ සියොන්වාදීන්ට මරණය” වැනි සටන් පාඨ කියමින් ටෙහෙරානයේ ප්‍රංශ සහ බ්‍රිතාන්‍ය තානාපති කාර්යාලවලින් පිටත පෙළපාලි ගියහ. ඉස්ෆහාන් සහ කොම් ප්‍රදේශවල ද විරෝධතා පැවැත්විණි.
බැග්ඩෑඩ්හිදී, විරෝධතාකරුවන් දහස් ගණනක් 2003 දී එක්සත් ජනපද වාඩිලාගැනීමේ හමුදා විසින් පිහිටුවන ලද ඉරාක අගනුවර ප්‍රදේශයේ වන හරිත කලාපයට ගමන් කළ නමුත්, ආරක්ෂක අංශ ඔවුන් එක්සත් ජනපද තානාපති කාර්යාලයට ගමන් කිරීම වළක්වා ඇත.
ගාසා තීරය නීති විරෝධී ඊශ්‍රායල් අවහිර කිරීමට එරෙහිව පලස්තීන ජනතාවගේ නැගිටීම අධිරාජ්‍යවාදයට සහ සියොන්වාදයට එරෙහිව කම්කරු පන්තිය තුල වැඩෙන ජාත්‍යන්තර ව්‍යාපාරයක කොටසකි. ගාසා තීරයේ ජනතාවට එරෙහිව සිදු කරන ලද ජන සංහාරක යුද්ධය සහ මනුෂ්‍යත්වයට එරෙහි අපරාධ නැවැත්වීමේ තීරනාත්මක ප්‍රශ්නය වන්නේ අධිරාජ්‍යවාදී යුද්ධයට හා ධනවාදයට එරෙහිව සහ සමාජවාදය සඳහා පොදු ව්‍යාපාරයක් තුල මෙම අරගල ඒකාබද්ධ කිරීමයි.
