ඇන්ඩෘ ඩැමන් විසිනි.
මෙහි පලවන්නේ ලෝක සමාජවාදී වෙබ් අඩවියේ 2023 නොවැම්බර් 01 දින පල වූ ‘Israel’s Jabaliya refugee camp bombing: A new stage of imperialist barbarism’යන ඇන්ඩෘ ඩැමන් විසින් ලියන ලද ඉදිරිදර්ශන ලිපියේ සිංහල පරිවර්තනයයි. පරිවර්තනය මිගාර මල්වත්ත විසිනි.
අඟහරුවාදා ගාසා තීරයේ ජබාලියා සරණාගත කඳවුරට බෝම්බ හෙලීමෙන් සිදු වූ බිහිසුණු ප්‍රතිඵලයෙන් ඉක්බිතිව, එක්සත් ජනපදය සහ එහි සහචරයෝ ඊශ්‍රායලයේ කුරිරුකම් සාධාරණීකරණය කරනවා පමණක් නොව, ගාසා තීරයේ සිවිල් ජනතාව නීත්‍යානුකූල මිලිටරි ඉලක්කයක් බවට ප්‍රකාශ කර ඇත.
අඟහරුවාදා, ඊශ්‍රායල ප්‍රහාරක ගුවන් යානා, ගාසා තීරයේ විශාලතම සරණාගත කඳවුර පිහිටි ජනාකීර්ණ ජබාලියා අසල්වැසි ප්‍රදේශයට බෝම්බ රොත්තක් හෙලීමෙන් දුසිම් ගනනක් මිය යාමෙන් පසු , ඊළඟ දවසේ, ඊශ්‍රායල ආරක්ෂක හමුදා (IDF) ජබාලියා කඳවුරට යලිත් ප්‍රහාර එල්ල කරමින් සමූලඝාතනය පිලිබඳ ගෝලීය කෝපයට ප්‍රතිචාර දැක්වීය. මෙම බෝම්බ ප්‍රහාර දෙකෙන් මියගිය සංඛ්‍යාව මේ වන විට 195 දක්වා ඉහළ ගොස් ඇති අතර 120 දෙනෙකු තවමත් අතුරුදහන් වී ඇත.
සියගණනක් කාන්තාවන් සහ ළමයින්ගෙන් පිරුණු ප්‍රදේශයකට හිතාමතාම ප්‍රහාර එල්ල කිරීම ගැන ඊශ්‍රායල බලධාරීන් සතුටු විය. “ඒත් ඔය සරණාගත කඳවුරේත් සරණාගතයෝ, අහිංසක සිවිල් මිනිස්සු, පිරිමි, ගෑණු, ළමයි ගොඩක් ඉන්නවා කියලා ඔයා දන්නවා නේද?” CNN නියාමක වුල්ෆ් බ්ලිට්සර් IDF ප්‍රකාශක, ලුතිනන් කර්නල් රිචඩ් හෙක්ට්ගෙන් ඇසුවේය.
පිළිතුර ඔව් බව හෙක්ට් පැහැදිලි කළේය. “මෙය යුද්ධයේ ඛේදවාචකය, වුල්ෆ්,” ඔහු පිළිතුරු දුන්නේය.
හෙක්ට්ගේ ප්‍රකාශයට සෘජුවම ප්‍රතිචාර දක්වන ලෙස ඉල්ලා සිටි විට, එක්සත් ජනපද පෙන්ටගනයේ ප්‍රකාශක බ්‍රිගේඩියර් ජෙනරල් පැට් රයිඩර් පලස්තීනුවන් “මිනිස් පලිහක්” ලෙස සේවය කරන බවට චෝදනා කරමින් ප්‍රහාරය අනුමත කළේය. බෝම්බ ප්‍රහාරයට ප්‍රතිචාර වශයෙන් සෙනෙට් සභික ලින්ඩ්සේ ග්‍රැහැම් ප්‍රසිද්ධියේ ප්‍රකාශ කළේ , ගාසා තීරයේ එක්සත් ජනපදය ඉවසීමට කැමති සිවිල් මරණ සංඛ්‍යාවට “සීමාවක්” නොමැති බවයි.
එක්සත් ජනපද-ඊශ්‍රායල සැලසුම් පැහැදිලි වෙමින් තිබේ. වසර 50ක් පුරා අධිරාජ්‍යවාදී බලවතුන් පලස්තීනුවන්ගේ “ප්‍රශ්නයට” “විසඳුමක්” ගැන කතා කරමින් සිටිති. දැන්, ඔවුන් එකක් සොයාගෙන ඇත: “පලස්තීන ප්‍රශ්නයේ අවසාන විසඳුමයි.”
ඊශ්‍රායලය අධිරාජ්‍යවාදී බලවතුන්ගේ සහාය ඇතිව සමූහ සමූලඝාතන හා වාර්ගික ශුද්ධ කිරීමේ යුද්ධයක් දියත් කරමින් සිටින්නේ, හැකිතාක් පලස්තීනුවන් මරා දැමීම සහ ජීවතුන් අතර සිටින සියල්ලන් ගාසා තීරයෙන් එලවා දැමීමේ අරමුනෙනි-එක්කෝ රටක් නැති සරණාගතයින් ලෙස ලොව පුරා විසිරුවා හැරීම හෝ සීනයි කාන්තාරයට [ඊජිප්තුව] එලවා දැමීමයි. .
බදාදා, ඊශ්‍රායල පාර්ලිමේන්තු මන්ත්‍රීවරයෙකු සහ ඊශ්‍රායල ආන්ඩුවේ හිටපු තොරතුරු ඇමතිනී ගැලිට් ඩිස්ටල්-ඇට්බාරියන් ඉල්ලා සිටියේ, “මුළු ගාසාව මිහිතලයෙන් මකා දැමිය යුතු” ලෙසත්, එසේ කිරීමේදී “ගාසාවේ රාක්ෂයන් දකුණු වැටට පියාසර කර ඊජිප්තු භූමියට ඇතුළු වීමට උත්සාහ කරනු ඇත – නැතහොත් ඔවුන් මිය යනු ඇත … ගාසාව මකා දැමිය යුතුය.” යන්නයි.
එක්සත් ජාතීන්ගේ මානව හිමිකම් පිළිබඳ මහ කොමසාරිස්වරයාගේ නිව් යෝර්ක් කාර්යාලයේ හිටපු අධ්‍යක්ෂ ක්‍රේග් මොකිබර් ගේ ඉල්ලා අස්වීම අඟහරුවාදා නිවේදනය කළ අතර, සමස්ත ලෝකයටම වඩ වඩාත් පැහැදිලිව පෙනෙන දේ එහි විස්තර කරයි., “මෙය සමූල ජන ඝාතනය සඳහා පාඨ ග්‍රන්ථමය වේ” යැයි මොකිබර් සඳහන් කළේය ය. “පලස්තීනයේ , යුරෝපීය, වාර්ගික-ජාතිකවාදී, පදිංචිකරුවන්ගේ යටත් විජිත ව්‍යාපෘතිය ස්වදේශික පලස්තීන ජීවිතයේ අවසාන නටබුන් කඩිනම් විනාශ කිරීම කරා, එහි අවසන් අදියරට පිවිස ඇත. ඊටත් වඩා, එක්සත් ජනපදයේ, එක්සත් රාජධානියේ සහ යුරෝපයේ බොහෝ ආන්ඩු, බිහිසුණු ප්‍රහාරයට මුලුමනින්ම හවුල් වේ. මෙම ආන්ඩු ජිනීවා සම්මුතීන් සඳහා ‘ගෞරවය සහතික කිරීමට ‘ ඔවුන්ගේ ගිවිසුම් බැඳීම් සපුරාලීම ප්‍රතික්ෂේප කරනවා පමණක් නොව, ඇත්ත වශයෙන්ම ඔවුන් ප්‍රහාරය සක්‍රීයව සන්නද්ධ කරමින්, ආර්ථික සහ බුද්ධිමය සහාය ලබා දෙමින් සහ ඊශ්‍රායලයේ කුරිරුකම් සඳහා දේශපාලන හා රාජ්‍ය තාන්ත්‍රික ආවරණයක් ලබා දෙමින් සිටිති.”
ගාසා තීරයේ මෙම සමූහ ඝාතනයට සහ වාර්ගික ශෝධනයට එක්සත් ජනපද හමුදා විසින් සක්‍රියව දායකත්වය සපයනු ලබන අතර මෙහෙයවීමද කරනු ලබයි. අඟහරුවාදා රාත්‍රියේ, නිව් යෝර්ක් ටයිම්ස් වාර්තා කළේ “ඇමරිකානු කමාන්ඩෝ භටයින් ඊශ්‍රායලයේ භූමියේ සිටි” බවයි. මෙය වූයේ පලස්තීනයේ හිටපු තානාපති සල්මාන් අල්-හර්ෆිගේ ප්‍රකාශයෙන් පසුවය. එක්සත් ජනපද හමුදා “ගාසාවේ භූමියේ හමුදා මෙහෙයුම්වලට සම්බන්ධ” බව ඔහු ප්‍රකාශ කළේය. එක්සත් ජනපද සහ නේටෝ හමුදා විසින් ගාසා තීරය ආක්‍රමණය කිරීම ඇතුළු ගැටුමේ දී , එක්සත් ජනපද හමුදා ඊටත් වඩා සෘජු භූමිකාවක් ඉටු කිරීම ගැන එක්සත් ජනපද නිලධාරීන් සාකච්ඡා කරමින් සිටිති.
ගාසා තීරයේ සිවිල් ජනතාවට එරෙහි කුරිරු යුද්ධය, සෝවියට් සංගමය විසුරුවා හැරීමෙන් පසුව,එක්සත් ජනපදය විසින් දියත් කල , දශක තුනක නිමක් නැති යුද්ධයේ ප්‍රතිඵලයකි. “මරණයේ මහා මාර්ගය” සහිත ගල්ෆ් යුද්ධයේ සිට යුගෝස්ලාවියාවේ සිවිල් යටිතල ව්‍යුහය ක්‍රමානුකූලව විනාශ කිරීම හරහා, “ත්‍රස්තවාදයට එරෙහි යුද්ධය” අතරතුර ඉරාකය සහ ඇෆ්ගනිස්ථානය ආක්‍රමණය කිරීම සහ අත්පත් කර ගැනීම දක්වා එය විහිදී යයි.
මෙම ගෝලීය යුද්ධ , ඉරානය, රුසියාව සහ චීනය ඉලක්ක කර ගනිමින් සර්ව ව්‍යාප්ත ගෝලීය ගැටුමක් ලෙස එක්සත් ජනපදය විසින් දකින දෙය බවට පරිවර්තනය වී ඇත. බ්ලින්කන් කැපිටල් හිල් හි දී, සාක්ෂියක් ලෙස ප්‍රකාශ කළ පරිදි, “අපේ විරුද්ධවාදීන් සඳහා, ඔවුන් රාජ්‍යයන් හෝ රාජ්‍ය නොවන අය වේවා, මේ සියල්ල එක සටනකි.”
ගාසා තීරයේ සිදුවන සමූලඝාතනය, විදේශ ප්‍රතිපත්තියේ මෙවලමක් ලෙස එක්සත් ජනපදය විසින් ජන සංහාරය වැලඳ ගැනීම සනිටුහන් කරයි. මේ මාසයේ බයිඩන් යලිත් සඳහන් කල පරිදි ඇමරිකාවේ “නව ලෝක පර්යාය ” ගොඩනැගෙන්නේ සමූහ මිනීමැරුම් මත ය.
එක්සත් ජනපදයේ සහ එහි සහචරයන්ගේ පැත්තෙන් යුද අපරාධ සඳහා පහසුකම් සලසා ගැනීමට සහ යුක්ති සහගත කිරීමට යොදා ගනු ලබන, ඇමරිකානු “මානව හිමිකම්” අධිරාජ්‍යවාදයේ සම්පූර්ණ කුහකත්වය පෙන්නුම් කර ඇත.2021 මාර්තු මාසයේදී මාරිපෝල් හි මාතෘ වාට්ටුවකට බෝම්බ ප්‍රහාරයක් එල්ල කර පුද්ගලයන් තිදෙනෙකු මරණයට පත් කළ බවට රුසියාවට චෝදනා එල්ල වූ විට , එක්සත් ජනපද උප ජනාධිපති කමලා හැරිස් ප්‍රකාශ කළේ එය “යුද අපරාධයක්” බවයි. එපමණකි .” එහෙත් ඊශ්‍රායලය, බයිඩන් පරිපාලනයේ පූර්ණ අනුග්‍රහය ඇතිව හිතාමතාම සිවිල් වැසියන් දහස් ගණනක් මරා දමයි.
ලොව පුරා මිලියන සංඛ්‍යාත ජනතාව මහජන උද්ඝෝෂන වලට සහභාගී වෙමින් එක්සත් ජනපදයේ සහ ඊශ්‍රායලයේ සාපරාධීත්වයට ප්‍රතිචාර දක්වා ඇත. සමූහ ඝාතනවලට එරෙහි මෙම උද්ඝෝෂන , “යුදෙව් විරෝධවාදී” ලෙස ,සැකෙන් බියෙන් තොරව , අධිරාජ්‍යවාදී ආන්ඩු විසින් හදුන්වනු ලබයි.
සංහාරය සිදු කරනු ලබන්නේ ඊශ්‍රායල රාජ්‍යය විසින් වන අතර, එය , යුදෙව් මිනිසුන්ගේ නොව එක්සත් ජනපද අධිරාජ්‍යවාදයේ බළල් අතක් (ප්‍රොක්සියක්) ලෙස ක්‍රියා කරයි, ඔවුන්ගෙන් [ යුදෙව්වන්] බොහෝ දෙනෙක් ඝාතනයට එරෙහි උද්ඝෝෂන වලට සහභාගී වූහ.
ගාසා තීරයට එක්සත් ජනපද-ඊශ්‍රායල් බෝම්බ හෙලීම සහ සියලුම ඊශ්‍රායල හමුදා බලමුලු ගැන්වීම වහාම නතර කරන ලෙස සහ ගාසා තීරයේ දේශසීමාවෙන් ඊශ්‍රායල හමුදා ඉවත් කිරීමට කම්කරුවන් ඉල්ලා සිටිය යුතුය. ගාසා තීරය වටලෑම අවසන් කළ යුතු අතර ආහාර, ජලය, විදුලිය, වෛද්‍ය ප්‍රතිකාර සහ අනෙකුත් සියලුම අවශ්‍යතා වහාම ලබා දිය යුතුය.
පසුගිය මාසයේ පලස්තීන වෘත්තීය සමිති කන්ඩායමක් ලොව පුරා කම්කරුවන්ගෙන් ඉල්ලා සිටියේ යුද උපකරණ හැසිරවීම ප්‍රතික්ෂේප කරන ලෙසයි. ඔක්තෝබර් 31දා, බෙල්ජියම් ගුවන් තොටුපළ ගොඩබිම් කාර්ය මණ්ඩල වෘත්තීය සමිති එකමුතුවක් “ඊශ්‍රායලයට ආයුධ නැව්ගත කිරීම නවත්වන ලෙස” ඔවුන්ගේ සාමාජිකයින්ගෙන් ඉල්ලා සිටියේ ය. ඊශ්‍රායලයේ ජන සංහාරයට සහාය විය හැකි ඕනෑම සම්පත් සැපයුමක් කපා හැරීමට, වැඩ වර්ජනවල නිරත වන ලෙස ලෝක සමාජවාදී වෙබ් අඩවිය ගෝලීය වශයෙන් කම්කරුවන්ගෙන් ඉල්ලා සිටී. ලොව පුරා නැව් තටාක සේවකයින්, ගුවන් තොටුපල කාර්ය මණ්ඩලය සහ ප්‍රවාහන සේවකයින් ඊශ්‍රායලයට යැවීම සඳහා අදහස් කරන ආයුධ නැව්ගත කිරීම ප්‍රතික්ෂේප කළ යුතුය.
ඊශ්‍රායලයේ ජන සංහාරයට එරෙහිව ලොව පුරා පුපුරා ගිය උද්ඝෝෂන සමාජවාදී වැඩපිලිවෙලක පදනම මත, කම්කරු පන්තිය වෙත හැරීමක් මගින් ගැඹුරු කර පුලුල් කල යුතුය. මෙම මහජන ව්‍යාපාරය සියලු ධනේශ්වර ආන්ඩුවලට සහ පාලක පන්තියේ දේශපාලන පක්ෂවලට එරෙහිව යොමු කළ යුතුය.
